ഒരു യാത്ര പോയി വന്നാൽ കാറുകൾ പലതരം സാധനങ്ങൾകൊണ്ട് നിറയാറുണ്ട്. പലപ്പോഴും അലസത കാരണം നാം അതിൽ പലതും എടുത്ത് പുറത്ത് വയ്ക്കാറുമില്ല. ഇത്തരം സാധനങ്ങളിൽ ചിലതെങ്കിലും വലിയ അപകടങ്ങൾക്ക് കാരണമാകാറുണ്ട്. അതുപോലെത്തന്നെ അത്യാവശ്യത്തിന് ചില സാധനങ്ങൾ നമ്മൾ കാറിനകത്ത് സൂക്ഷിക്കാറുണ്ട്. ടിഷ്യൂ പേപ്പർ മുതൽ വെള്ളക്കുപ്പി വരെ ഇതിൽപ്പെടുന്നു. ഇതിൽ പല സാധനങ്ങളും നമ്മൾ സ്ഥിരമായി കാറിൽ സൂക്ഷിക്കുന്ന വസ്തുക്കളാണ്. എന്നാൽ കാറിനുള്ളിൽ സൂക്ഷിക്കാൻ പാടില്ലാത്ത ചില വസ്തുക്കളുമുണ്ട്. ഇതിൽ ചിലത് പരിചയപ്പെടാം.
എയറോസേൾ കാനുകൾ
കാറിൽ ഉപേക്ഷിക്കാൻ പാടില്ലാത്ത ഏറ്റവും പ്രധാന സാധനം എയറോസോൾ ക്യാനുകളാണ്. എയർ ഫ്രഷ്നറുകൾ, ഡിയോഡറന്റുകൾ, സ്പ്രേ പെയിന്റുകൾ എന്നിവയെല്ലാം എയറോസോൾ കാനുകളിലാണ് വരാറുള്ളത്. ഇവ നമ്മുടെ വാഹനത്തിന്റെ ഇന്റീരിയർ അല്ലെങ്കിൽ ചില സന്ദർഭങ്ങളിൽ മുഴുവൻ വാഹനവും നശിപ്പിക്കാൻ ആവശ്യമായ ചെറിയ സ്‌ഫോടനം ഉണ്ടാക്കാൻ ശേഷിയുള്ളതാണ്.
സാനിറ്റൈസർ
കോവിഡ് മഹാമാരി ലോകത്തെയാകെ പിടിച്ചുലച്ചപ്പോൾ നമ്മുടെയെല്ലാം ജീവിതത്തിന്റെ ഭാഗമായി മാറിയ വസ്തുക്കളിൽ ഒന്നാണ് സാനിറ്റൈസർ. ഇപ്പോഴും ഹാൻഡ് സാനിറ്റൈസർ സ്ഥിരമായി ഉപയോഗിക്കുന്നവർ നിരവധിയാണ്. അതിനാൽ തന്നെ കാറിനകത്ത് ഇത്തരത്തിൽ ഒരു സാനിറ്റൈസർ ബോട്ടിൽ സൂക്ഷിക്കുന്ന ശീലം ചിലർക്കുണ്ടാകും. സാനിറ്റൈസറുകളിൽ ആൽക്കഹോൾ അടങ്ങിയിരിക്കുന്ന കാര്യം പലർക്കും അറിയുമായിരിക്കും. ആൽക്കഹോൾ തീപിടിക്കാൻ സാധ്യതയുള്ള വസ്തുവാണ്. കാറിനകത്ത് സൂക്ഷിച്ച സാനിറ്റൈസറിലേക്ക് നേരിട്ട് സൂര്യപ്രകാശം പതിച്ചാൽ അത് അപകം ചെയ്യാം.
നേരിട്ട് സൂര്യപ്രകാശം ലഭിക്കുന്ന ഇടങ്ങളിൽ കാർ പാർക്ക് ചെയ്ത് പോയൽ അകത്ത് ചൂട് കൂടും. ഇത് സാനിറ്റൈസർ പൊട്ടിത്തെറിക്കുന്ന സാഹചര്യത്തിലേക്ക് നയിച്ചേക്കും. ഇത്തരത്തിൽ ചില സംഭവങ്ങൾ വിദേശ രാജ്യങ്ങളിൽ റിപ്പോർട്ട് ചെയ്തിട്ടുണ്ട്. അതിനാൽ തന്നെ സാനിറ്റൈസർ കാറിൽ വെച്ച് പോകുന്നത് ഒഴിവാക്കേണ്ടതാണ്. അഥവാ കൊണ്ടുപോകുന്നുണ്ടെങ്കിൽ തന്നെ നേരിട്ട് സൂര്യപ്രകാശം ലഭിക്കുന്ന സ്ഥലത്ത് സൂക്ഷിക്കാതിരിക്കുക.
മെഡിസിൻ
പലപ്പോഴും കാറുകളുമായി പുറത്ത് ജോലിക്ക് പോകുന്ന ആളുകൾക്ക് മരുന്ന് വണ്ടിയിൽ തന്നെ സൂക്ഷിക്കുന്ന പതിവുണ്ടാകും. ഇത് തെറ്റായ ശീലമാണ്. കാറിനകത്തെ താപനില മാറിക്കൊണ്ടിരിക്കുന്നതാണല്ലോ. ചിലപ്പോൾ നമ്മൾ എസി ഓണാക്കും. ചിലപ്പോൾ വണ്ടി പാർക്ക് ചെയ്ത് പോകും. ഇതെല്ലാം മരുന്നുകളെ സ്വാധീനിക്കും. മരുന്നുകൾ ഹൈപ്പോതെർമിക് ആയതിനാൽ താപനിലയിലെ ഏറ്റക്കുറച്ചിലുകൾ കാരണം അതിന്റെ ഫലപ്രാപ്തി നഷ്ടപ്പെടാൻ സാധ്യതയുണ്ട്. അതുകൊണ്ട് മരുന്ന് കഴിക്കുന്നതിന്റെ ഫലം കിട്ടണമെന്നുണ്ടെങ്കിൽ അവ സ്ഥിരമായി കാറിൽ സൂക്ഷിക്കാതിരിക്കാൻ ശ്രദ്ധിക്കുക.
സൺസ്‌ക്രീൻ ലോഷനുകൾ
സൂര്യപ്രകാശത്തിൽ നിന്ന് ചർമം പരിരക്ഷിക്കാൻ സൺസ്‌ക്രീൻ ഉപയോഗിക്കുന്നവരുണ്ട്. സൺസ്‌ക്രീനും മറ്റ് സൗന്ദര്യ വർധക വസ്തുക്കളും കാറിൽ ഉപേക്ഷിച്ച് പോകരുതെന്നാണ് പ്രമാണം. കാറിനകത്ത് നല്ല ചൂടുള്ള സ്ഥലത്താണ് കോസ്‌മെറ്റിക്‌സ് സൂക്ഷിക്കുന്നതെങ്കിൽ അതിന്റെ സ്വഭാവം മാറുകയും കേടാകുകയും ചെയ്യും. ഇത് പിന്നീട് ഉപയോഗിക്കുമ്പോൾ ചർമ്മത്തെ ദോഷകരമായി ബാധിക്കും. അതിനാൽ തന്നെ സൺസ്‌ക്രീൻ അടക്കമുള്ള കോസ്‌മെറ്റിക് സാധനങ്ങൾ നിശ്ചിത ചൂട് ഉള്ള സ്ഥലങ്ങളിൽ മാത്രം സൂക്ഷിക്കാൻ ശ്രമിക്കുക.
മദ്യം
മദ്യപിക്കുന്ന ശീലമുള്ള ചിലപ്പോഴെങ്കിലും മദ്യം കാറിൽ സ്‌റ്റോക്ക് ചെയ്യുന്ന രീതി കാണാറുണ്ട്. എന്നാൽ മുകളിൽ സാനിറ്റൈസറിന്റെ കാര്യത്തിൽ പറഞ്ഞ അതേ കാര്യം തന്നെയാണ് ഇവിടെയും പറയാനുള്ളത്. തികച്ചും അപകടകരമായ ഈ പ്രവർത്തിയും ഒഴിവാക്കാൻ ശ്രമിക്കുക.
ലൈറ്റർ
പുകവലിക്കുന്ന ശീലമുള്ളവർക്ക് സ്ഥിരമായി കൈയ്യിൽ ഒരു ലൈറ്റർ കൊണ്ടുനടക്കുന്ന ശീലമുണ്ടാകും. ചിലർ സൗകര്യത്തിനായി കാറിനകത്തും ലൈറ്റർ സൂക്ഷിക്കും. എന്നാൽ ലൈറ്ററിനകത്ത് കത്താൻ സാധ്യതയുള്ള ദ്രാവകമുള്ളതിനാൽ കാറിനകത്ത് അവ സൂക്ഷിക്കുന്നത് അപകടകരമാണ്. ഏതെങ്കിലും കാരണത്താൽ കാറിൽ തീപിടിത്തം ഉണ്ടായാൽ ഇത്തരം സാധനങ്ങൾ അതിന്റെ തീവ്രത വർധിപ്പിക്കും.
വളർത്തുമൃഗങ്ങൾ ചെടികൾ എന്നിങ്ങനെയുള്ള ജൈവ വസ്തുക്കളും മൊബൈൽ, ടാബ്‍ലറ്റ്, ലാപ്ടോപ്പ് പോലുള്ള ഇലക്ട്രോണിക് സാധനങ്ങളും വാഹനങ്ങളിൽ ഉപേക്ഷിച്ച് പോകാൻ പാടുള്ളതല്ല. കാറിനുള്ളിലെ ഉയർന്ന ചൂടും ഹ്യൂമിഡിറ്റിയും ഇതെല്ലാത്തിനും കേടുവരുത്താൻ സാധ്യതയുണ്ട്.
