ആര്‍ആര്‍ആറിന്റെ തകര്‍പ്പന്‍ വിജയത്തിനു ശേഷം ജൂനിയര്‍ എന്‍ടിആര്‍ ബോളിവുഡിലേക്ക്. ഋത്വിക് റോഷനൊപ്പം ബോളിവുഡില്‍ യഷ് രാജ് ഫിലിംസിന്റെ സ്‌പൈ യൂണിവേഴ്‌സ് ചിത്രത്തില്‍ പ്രധാന വേഷത്തിലെത്താനുള്ള തയ്യാറെടുപ്പിലാണ് ജൂനിയര്‍ എന്‍ടിആര്‍. ഋത്വിക്കിനൊപ്പം വാര്‍ 2 ല്‍ ജൂനിയര്‍ എന്‍ടിആറും എത്തുമെന്നാണ് റിപ്പോര്‍ട്ടുകള്‍.
ബോളിവുഡ് ചിത്രത്തിനായി ജൂനിയര്‍ എന്‍ടിആര്‍ വാങ്ങുന്ന പ്രതിഫലമാണ് മറ്റൊരു ശ്രദ്ധേയമായ കാര്യം. ആര്‍ആര്‍ആറില്‍ അഭിനയിക്കാന്‍ 45 കോടിയായിരുന്നു താരം പ്രതിഫലമായി വാങ്ങിയത്. എന്നാല്‍ പുതിയ ചിത്രത്തിനായി പ്രതിഫലത്തില്‍ നൂറ് ശതമാനം വര്‍ധനവാണ് അദ്ദേഹം ഇപ്പോള്‍ വരുത്തിയിരിക്കുന്നത്. ആര്‍ആര്‍ആര്‍ ആഗോള തലത്തില്‍ തന്നെ വമ്പന്‍ ഹിറ്റായതോടെയാണ് ജൂനിയര്‍ എന്‍ടിആറിന്റേയും രാംചരണിന്റേയും താരമൂല്യവും കുത്തനെ ഉയര്‍ന്നത്. വാര്‍ 2 നു വണ്ടി 100 കോടി രൂപയാണ് താരം പ്രതിഫലമായി വാങ്ങുന്നതെന്നാണ് ബോളിവുഡ് ഹങ്കാമ റിപ്പോര്‍ട്ടില്‍ പറയുന്നത്. അതേസമയം, വാര്‍ 2 ല്‍ ഋത്വിക് റോഷന്റെ വില്ലനായാണ് ജൂനിയര്‍ എന്‍ടിആര്‍ എത്തുന്നതെന്നാണ് റിപ്പോര്‍ട്ടുകള്‍.
