ചെമ്പന്‍ വിനോദ് ജോസ്, ബാബുരാജ് തുടങ്ങിയവരെ പ്രധാന കഥപാത്രങ്ങളാകുന്ന ‘നല്ല നിലാവുള്ള രാത്രി’ സിനിമയിലെ ട്രെയിലര്‍ പുറത്ത്. നവാഗത സംവിധായകന്‍ മര്‍ഫി ദേവസി സംവിധാനം ചെയ്യുന്ന ചിത്രം സസ്‌പെന്‍സ് ത്രില്ലറായാണ് എത്തുന്നത്. കൂടെ ഒന്നിച്ചു പഠിച്ച സുഹൃത്തുക്കള്‍ കാടിനുള്ളിലെ ഒറ്റപ്പെട്ട വീട്ടില്‍ ഒന്നിച്ചുകൂടുന്നതും തുടര്‍ന്നുണ്ടാകുന്ന അപ്രതീക്ഷിത സംഭവങ്ങളുമാണ് ചിത്രം പറയുന്നത്. ആകാംക്ഷ നിറയ്ക്കുന്നതാണ് ട്രെയിലര്‍.
ജിനു ജോസഫ്, ബിനു പപ്പു, റോണി ഡേവിഡ് രാജ്, ഗണപതി, നിതിന്‍ ജോര്‍ജ്, സജിന്‍ ചെറുകയില്‍ തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നുണ്ട്. സ്ത്രീകഥാപാത്രങ്ങള്‍ ആരും തന്നെ ഇല്ലാത്ത ഒരു സിനിമ എന്ന പ്രത്യേകതയും നല്ല നിലാവുള്ള രാത്രിക്കുണ്ട്.
സാന്ദ്രാ തോമസ് പ്രൊഡക്ഷന്‍സിന്റെ ബാനറില്‍ സാന്ദ്ര തോമസ്, വില്‍സന്‍ തോമസ് എന്നിവരാണ് നിര്‍മിക്കുന്നത്. ഒരു ഇടവേളയ്ക്ക് ശേഷമുള്ള സാന്ദ്ര തോമസിന്റെ തിരിച്ചുവരവാണ് ഇത്. അജയ് ഡേവിഡ് കാച്ചപ്പിള്ളിയാണ് ചിത്രത്തിന്റെ ഛായാഗ്രഹണം. സംവിധായകനൊപ്പം പ്രഭുല്‍ സുരേഷാണ് തിരക്കഥ.
