ഫഹദ് ഫാസിലും അപര്‍ണ ബാലമുരളിയും ഒന്നിക്കുന്ന ധൂമത്തിന്റെ ട്രെയിലര്‍ പുറത്തിറങ്ങി. കെജിഎഫും കാന്താരയുമടക്കമുള്ള സിനിമകളിലൂടെ മലയാളി പ്രേക്ഷകരെയും അത്ഭുതപ്പെടുത്തിയ ഹോംബാലെ ഫിലിംസാണ് ധൂമത്തിന്റെ നിര്‍മാണം. ഹോംബാലെ ഫിലിംസിന്റെ യുട്യൂബ് ചാനലിലൂടെയാണ് ട്രെയിലര്‍ റിലീസ് ചെയ്തത്. പ്രേക്ഷകരെ ത്രില്ലടിപ്പിക്കുന്നതായിരിക്കും ചിത്രമെന്നാണ് ട്രെയിലര്‍ നല്‍കുന്ന സൂചന. ജൂണ്‍ 23ന് ചിത്രം തീയേറ്ററുകളിലെത്തും.
കന്നഡ ചലച്ചിത്ര നിര്‍മാതാവ് പവന്‍ കുമാറാണ് ചിത്രത്തിന്റെ സംവിധാനം. മലയാളത്തിനൊപ്പം തമിഴ്, കന്നഡ, തെലുങ്ക് ഭാഷകളിലും ചിത്രം പ്രദര്‍ശനത്തിനെത്തും. പവന്‍ കുമാര്‍ തന്നെയാണ് ധൂമത്തിന്റെ തിരക്കഥയും രചിച്ചിരിക്കുന്നത്. മഹേഷിന്റെ പ്രതികാരം എന്ന ചിത്രത്തിന് ശേഷം ഫഹദും അപര്‍ണയും വീണ്ടും ഒന്നിക്കുന്ന ചിത്രമാണ് ധൂമം. മാജിക് ഫ്രെയിംസും പൃഥ്വിരാജ് പ്രൊഡക്ഷന്‍സും ചേര്‍ന്നാണ് ചിത്രം തീയേറ്ററുകളിലെത്തിക്കുക.
