ഹിറ്റ് മേക്കര്‍ ജോഷിയുടെ മകന്‍ അഭിലാഷ് ജോഷി സംവിധാനം ചെയ്യുന്ന പ്രേക്ഷകര്‍ കാത്തിരിക്കുന്ന ദുല്‍ഖര്‍ സല്‍മാന്‍ ചിത്രം കിങ് ഓഫ് കൊത്ത ഓഗസ്റ്റ് 24ന് തീയേറ്ററുകളിലെത്തുമെന്ന് സൂചന. ഓണം റിലീസായി ഒരുങ്ങുന്ന ചിത്രത്തിന്റെ ചിത്രീകരണം കഴിഞ്ഞ ദിവസമാണ് പൂര്‍ത്തിയായത്. കിങ് ഓഫ് കൊത്തയുടെ ടീസര്‍ ഉടന്‍ എത്തുമെന്നാണ് റിപ്പോര്‍ട്ടുകള്‍.
കിങ് ഓഫ് കൊത്ത മലയാളത്തിന് പുറമെ തമിഴ് , തെലുങ്ക് , കന്നഡ, ഹിന്ദി പതിപ്പുകളിലായിട്ടാണ് ഒരുക്കുന്നത്. കേരളത്തില്‍ മാത്രം ഇരുനൂറിലേറെ സ്‌ക്രീനുകളിലും, ആഗോളതലത്തില്‍ ആയിരത്തിലധികം സ്‌ക്രീനുകളിലും ഒരുമിച്ച് റിലീസ് ചെയ്യാനാണ് തീരുമാനം.
കുറുപ്പിന് ശേഷം ദുല്‍ഖര്‍ നായകനായെത്തുന്ന മലയാള ചിത്രമാണ് കിങ് ഓഫ് കൊത്ത. ചിത്രത്തിന്റെ ഫസ്റ്റ് ലുക്ക് പോസ്റ്റര്‍ മാത്രമേ ഇതുവരെ പുറത്തുവന്നിട്ടുള്ളൂവെങ്കിലും കിങ് ഓഫ് കൊത്ത ഒരു മാസ് ഗ്യാങ് ചിത്രമാണെന്ന പ്രതീക്ഷയിലാണ് ആരാധകര്‍. ഐശ്വര്യ ലക്ഷ്മിയാണ് ചിത്രത്തിലെ നായിക.
