പ്രഭാസ്, അമിതാഭ് ബച്ചന്‍, ദീപിക പദുകോണ്‍ എന്നിവര്‍ കേന്ദ്രകഥാപാത്രങ്ങളാകുന്ന ചിത്രത്തിന്റെ ടൈറ്റില്‍ അനൗണ്‍സ്‌മെന്റ് വീഡിയോ വൈറലായി. പ്രോജക്ട് കെ എന്ന് താത്കാലികമായി അറിയപ്പെട്ടിരുന്ന ചിത്രത്തിന്റെ പേര് ‘കല്‍ക്കി 2898 എഡി’ എന്നാണ്. ഒന്നേകാല്‍ മിനിട്ടുള്ള ഗ്ലിംപ്സ് വീഡിയോയാണ് സമൂഹമാദ്ധ്യമങ്ങളില്‍ ട്രെന്റിംഗിലായത്.
ഭാവിയില്‍ നടക്കുന്ന കഥയാണെന്ന സൂചനയാണ് ഗ്ലിംപ്സ് വീഡിയോ നല്‍കുന്നത്. നാഗ് അശ്വിന്‍ സംവിധാനം ചെയ്യുന്ന ചിത്രം വൈജയന്തി മൂവീസിന്റെ ബാനറില്‍ അശ്വിനി ധത്താണ് നിര്‍മ്മിക്കുന്നത്. പ്രഭാസ് സൂപ്പര്‍ ഹീറോയായി എത്തുന്ന ചിത്രത്തില്‍ കമല്‍ ഹാസന്‍, ദിഷാ പഠാനി തമിഴ് താരം പശുപതി എന്നിവരും പ്രധാന വേഷങ്ങളിലെത്തുന്നുണ്ട്.
നേരത്തെ പുറത്തിറങ്ങിയ പ്രഭാസിന്റെയും ദീപികയുടെയും ക്യാരക്ടര്‍ പോസ്റ്ററുകള്‍ ഏറെ ശ്രദ്ധിക്കപ്പെട്ടിരുന്നു. സയന്‍സ് ഫിക്ഷന്‍ വിഭാഗത്തില്‍പ്പെടുന്ന ചിത്രം 2020 ഫെബ്രുവരിയിലാണ് പ്രഖ്യാപിച്ചത്. ഏറ്റവും ചെലവേറിയ ഇന്ത്യന്‍ സിനിമയായ ‘കല്‍ക്കി 2898’ 2024 ജനുവരി 12ന് തിയേറ്ററുകളിലെത്തും.
