ഷെയ്ന്‍ നായകനാകുന്ന പുതിയ ചിത്രമാണ് വേല. ഒരു ക്രൈം ഡ്രാമയായാണ് ചിത്രം എത്തുന്നത്. ഒരു ഇടവേളയ്ക്ക് ശേഷം നടന്‍ സണ്ണി വെയ്നും ചിത്രത്തില്‍ ഒരു കേന്ദ്ര കഥാപാത്രത്തെ അവതരിപ്പിക്കുന്നുണ്ട്. കൊറോണ പേപ്പേഴ്സിന് ശേഷം ഷെയ്ന്‍ വീണ്ടും ഒരു മുഴുനീള പോലീസ് വേഷത്തില്‍ എത്തുന്നു എന്ന പ്രത്യേകതയും ചിത്രത്തിനുണ്ട്.
നവാഗതനായ ശ്യാം ശശിയാണ് വേലയുടെ സംവിധായകന്‍. ഇപ്പോഴിതാ സിനിമയുടെ റിലീസ് തീയതി പ്രഖ്യാപിച്ചിരിക്കുകയാണ്. ചിത്രം നവംബര്‍ 10 നാണ് പ്രദര്‍ശനത്തിനെത്തുന്നത്. ചിത്രത്തില്‍ സിദ്ധാര്‍ത്ഥ് ഭരതനും ഒരു പ്രധാന വേഷം കൈകാര്യം ചെയ്യുന്നുണ്ട്.
പോലീസ് കണ്‍ട്രോള്‍ റൂം പശ്ചാത്തലമാക്കി ഒരുങ്ങുന്ന കഥയാണ് ചിത്രത്തിന്റെ പ്രമേയം. കാഴ്ചക്കാരെ ആവേശത്തിലാഴ്ത്തുന്ന തരത്തിലാണ് ചിത്രത്തിന്റെ ട്രെയിലര്‍. പോലീസ് വേഷത്തിലുള്ള ഷെയ്ന്‍ നിഗത്തിന്റെയും എസ്‌ഐ മല്ലികാര്‍ജുനനായി എത്തുന്ന സണ്ണി വെയ്ന്റെയും ക്യാരക്ടര്‍ പോസ്റ്ററുകള്‍ നേരത്തെ സമൂഹമാദ്ധ്യമങ്ങളില്‍ ശ്രദ്ധയാകര്‍ഷിച്ചിരുന്നു.
തെന്നിന്ത്യന്‍ നായിക അതിഥി ബാലനാണ് ചിത്രത്തിലെ നായിക. എസ് ജോര്‍ജ് നിര്‍മ്മിക്കുന്ന ചിത്രത്തിന്റെ കേരളത്തിലെ വിതരണം ദുല്‍ഖറിന്റെ വേഫെറെര്‍ ഫിലിംസാണ് ഏറ്റെടുത്തിരിക്കുന്നത്‌
