സൗദി വെള്ളക്ക എന്ന ചിത്രത്തിന് ശേഷം തരുണ്‍ മൂര്‍ത്തി സംവിധാനം ചെയ്യുന്ന ചിത്രമാണ് എല്‍360. മോഹന്‍ലാലിനൊപ്പം ശോഭനയാണ് ചിത്രത്തില്‍ പ്രധാന വേഷത്തിലെത്തുന്നത്. 75 ദിവസത്തെ ചിത്രീകരണത്തിനു ശേഷം ഇപ്പോള്‍ എല്ലാവരും ഷെഡ്യൂള്‍ ബ്രേക്ക് എടുക്കുകയാണ്. എന്നാല്‍ ഇപ്പോള്‍ ശ്രദ്ധനേടുന്നത് ചിത്രത്തിന്റെ അണിയറ പ്രവര്‍ത്തകരോട് യാത്ര പറഞ്ഞിറങ്ങുന്ന മോഹന്‍ലാലിന്റെ വിഡിയോ ആണ്.
ഒരുപാട് സിനിമകള്‍ ചെയ്യുമ്പോഴും ചില സിനിമകളോട് ഒരു സ്‌നേഹം തോന്നുമെന്നും അങ്ങനെ സ്‌നേഹം തോന്നിയ ചിത്രമാണ് ഇതെന്നുമാണ് മോഹന്‍ലാല്‍ പറഞ്ഞത്. വിഷമത്തോടെയാണ് സെറ്റിനോട് വിടപറയുന്നതെന്നും താരം പറഞ്ഞു.
’47 വര്‍ഷമായി അഭിനയിക്കുകയാണ്. ഈ സിനിമയും ആദ്യത്തെ സിനിമ പോലെ തന്നെയാണ്. ഒരുപാട് സിനിമകള്‍ ചെയ്യുമ്പോഴും ചില സിനിമകളോട് ഒരു സ്‌നേഹം തോന്നും. അങ്ങനെ സ്‌നേഹം തോന്നിയ ഒരു സിനിമയാണ് ഇത്. പോകുമ്പോള്‍ ഒരു ചെറിയ സങ്കടം ഉണ്ടാവും. ആ സങ്കടത്തോട് കൂടി ഞാന്‍ പോകുന്നു. ഇവിടെ തന്നെ നിന്ന എത്രയോ ദിവസങ്ങള്‍. ആ സന്തോഷത്തിലും സ്‌നേഹത്തിലും സങ്കടത്തിലും പോകുന്നു. വീണ്ടും എളുപ്പം തിരിച്ചുവരാം.’- മോഹന്‍ലാല്‍ പറഞ്ഞു. കെ.ആര്‍. സുനിലിന്റെതാണ് ചിത്രത്തിന്റെ കഥ. തിരക്കഥയൊരുക്കിയിരിക്കുന്നത് തരുണ്‍ മൂര്‍ത്തി. അതേസമയം എമ്പുരാന്റെ ചിത്രീകരണത്തില്‍ മോഹന്‍ലാല്‍ ജോയിന്‍ ചെയ്യും. ഗുജറാത്തില്‍ ചിത്രീകരിക്കുന്ന ഭാഗങ്ങളിലാകും മോഹന്‍ലാല്‍ ഇനി അഭിനയിക്കുക.
