കരിക്ക് വെബ്‌സീരിസിലൂടെ ശ്രദ്ധേയയായ നടിയാണ് സ്നേഹ ബാബു. ഇപ്പോള്‍ ഒരു സന്തോഷവാര്‍ത്തയുമായി എത്തിയിരിക്കുകയാണ് താരം. അമ്മയാകാന്‍ പോകുന്നുവെന്ന വിവരമാണ് സ്നേഹ വെളിപ്പെടുത്തിയത്. സോഷ്യല്‍ മീഡിയയില്‍ പങ്കുവച്ച വിഡിയോയിലൂടെയാണ് താരം സന്തോഷം പങ്കുവച്ചത്.
‘എല്ലാരോടും പറയണം. എല്ലാവരും അറിയണം. അതാണ് അതിന്റെയൊരു മര്യാദ’ എന്ന വിനീത് ശ്രീനിവാസന്റെ ഹിറ്റ് ഡയലോഗിനൊപ്പമുള്ള റീലാണ് താരം പങ്കുവച്ചത്. ‘ആശംസകള്‍ മാത്രം പോരാ’ എന്നും അടിക്കുറിപ്പായി താരം ചേര്‍ത്തിട്ടുണ്ട്. താരങ്ങളും ആരാധകരും ഉള്‍പ്പടെ നിരവധി പേരാണ് ആശംസകളുമായി പോസ്റ്റിന് താഴെ എത്തിയിരിക്കുന്നത്. എടാ മോളേ എന്നായിരുന്നു സാനിയ അയ്യപ്പന്റെ കമന്റ്. ആര്‍ഷ ബൈജു, ഐമ റോസ്മി, ഫെമിന ജോര്‍ജ് തുടങ്ങിയ നിരവധി പേരാണ് ആശംസകള്‍ കുറിച്ചത്. ജനുവരിയിലായിരുന്നു സ്‌നേഹയുടെ വിവാഹം. കരിക്ക് ടീമിന്റെ സാമര്‍ത്ഥ്യശാസ്ത്രം എന്ന സീരീസിന്റെ ഛായാഗ്രാഹകനായ അഖില്‍ സേവ്യറാണ് സ്‌നേഹയുടെ ഭര്‍ത്താവ്. ‘സാമര്‍ത്ഥ്യ ശാസ്ത്ര’ത്തിന്റെ ചിത്രീകരണത്തിനിടെയാണ് ഇരുവരും പരിചയപ്പെടുന്നതും ആ സൗഹൃദം പ്രണയമാകുന്നതും. ഈ സീരീസില്‍ ഒരു പ്രധാന വേഷത്തില്‍ സ്നേഹയും എത്തിയിരുന്നു. ആദ്യരാത്രി, ഗാനഗന്ധര്‍വന്‍, മിന്നല്‍ മുരളി എന്നീ ചിത്രങ്ങളില്‍ ശ്രദ്ധേമായ വേഷങ്ങളിലും സ്നേഹ പ്രത്യക്ഷപ്പെട്ടിട്ടുണ്ട്.
