നടി പാര്‍വതി നായരുടെ വിവാഹ ചിത്രങ്ങള്‍ സോഷ്യല്‍ മീഡിയയില്‍ വൈറലാകുന്നു. ഹൈദരാബാദ് സ്വദേശിയായ ബിസിനസ്സുകാരന്‍ ആശ്രിതാണ് പാര്‍വതിയുടെ വരന്‍. ചെന്നൈയില്‍ വെച്ച് ഇന്നലെയായിരുന്നു വിവാഹം.
ഈ അടുത്താണ് തന്റെ പ്രണയത്തിന്റ സന്തോഷം പാര്‍വതി സമൂഹ മാധ്യമങ്ങളിലൂടെ പങ്കുവെച്ചത്. എന്റെ പ്രണയത്തിനൊപ്പം ജീവിതം മറ്റൊരു ഘട്ടത്തിലേക്ക് കടക്കാന്‍ പോകുന്നു എന്ന് പറയുന്നതില്‍ ഒരുപാട് സന്തോഷമുണ്ട്. ഒരു പാര്‍ട്ടിയില്‍ വെച്ച് ആണ് ഞാന്‍ ആശ്രിതിനെ ആദ്യമായി കാണുന്നത്. തീര്‍ത്തും യാദൃശ്ചികമായൊരു കണ്ടുമുട്ടല്‍. ആ ദിവസം ഞങ്ങള്‍ മുന്‍പരിചയം ഉള്ളവരെ പോലെ ഒരുപാട് സംസാരിച്ചു, പക്ഷേ സത്യം പറഞ്ഞാല്‍, കൂടുതല്‍ അടുത്തറിയാന്‍ ഞങ്ങള്‍ക്ക് കുറച്ച് മാസങ്ങള്‍ എടുത്തു,’ എന്നായിരുന്നു പാര്‍വതി പറഞ്ഞത്.
മലയാളിയായ പാര്‍വതി മോഡലിങ്ങിലൂടെയാണ് സിനിമയിലെത്തുന്നത്. വി കെ പ്രകാശ് സംവിധാനം ചെയ്ത പോപ്പിന്‍സ് എന്ന ചിത്രത്തിലൂടെയായിരുന്നു അരങ്ങേറ്റം. പിന്നീട് യക്ഷി, ഫെയ്ത്ഫുള്ളി യുവേഴ്സ്, നീ കൊ ഞാ ചാ, ഡോള്‍സ് തുടങ്ങിയ മലയാള ചിത്രങ്ങളില്‍ വേഷമിട്ട താരം കന്നഡയിലും തമിഴിലും ചിത്രങ്ങള്‍ ചെയ്തു. അജിത്ത് നായകനായെത്തിയ തമിഴ് ചിത്രം യെന്നൈ അറിന്താലിലെ കഥാപാത്രം ഏറെ ശ്രദ്ധിക്കപ്പെട്ടു. ഉത്തമ വില്ലന്‍, ജെയിംസ് ആന്‍ഡ് ആലീസ്, നിമിര്‍, നീരാളി, സീതാക്കത്തി തുടങ്ങിയവയാണ് മറ്റ് ശ്രദ്ധേയ ചിത്രങ്ങള്‍.
