അണ്ഡാശയത്തിൽ രൂപപ്പെടുന്ന കോശങ്ങളുടെ വളർച്ചയാണ് അണ്ഡാശയ അർബുദം. കോശങ്ങൾ വേഗത്തിൽ വർദ്ധിക്കുകയും ആരോഗ്യമുള്ള ശരീര കോശങ്ങളെ ആക്രമിക്കുകയും നശിപ്പിക്കുകയും ചെയ്യും. പ്രായം, കുടുംബത്തിലെ അർബുദ ചരിത്രം, ഭാരം, ജീവിതശൈലി തുടങ്ങിയവ അണ്ഡാശയ അർബുദ സാധ്യത വർദ്ധിപ്പിക്കുന്നു.
‘ഇന്ത്യയിൽ അണ്ഡാശയ കാൻസർ വർദ്ധിച്ചുവരുന്ന ആശങ്കയാണ്. ഏറ്റവും പുതിയ കണക്കുകൾ പ്രകാരം, രാജ്യത്തെ മൂന്നാമത്തെ ഏറ്റവും സാധാരണമായ ഗൈനക്കോളജിക്കൽ കാൻസറാണിത്. കൃത്യമായ സംഖ്യകൾ വർഷം തോറും വ്യത്യാസപ്പെടുന്നുണ്ടെങ്കിലും, സംഭവങ്ങൾ വർദ്ധിച്ചുകൊണ്ടിരിക്കുകയാണ്. ഈ പ്രവണത രോഗത്തെയും അതിന്റെ ചികിത്സാരീതികളെയും മനസ്സിലാക്കേണ്ടതിന്റെ പ്രാധാന്യം ഊന്നിപ്പറയുന്നു…’ – ബെംഗളൂരുവിലെ ബിജിഎസ് ഗ്ലെനീഗിൾസ് ഗ്ലോബൽ ഹോസ്പിറ്റലിലെ എച്ച്ഒഡിയും സീനിയർ കൺസൾട്ടന്റ് സർജിക്കൽ ഓങ്കോളജിസ്റ്റുമായ ഡോ. മോണിക്ക പൻസാരി പറഞ്ഞു.
അണ്ഡാശയ കാൻസർ ലക്ഷണങ്ങൾ…
വയറു വീർക്കുക
വയറുവേദന അനുഭവപ്പെടുക.
ഭക്ഷണം കഴിക്കുന്നതിൽ ബുദ്ധിമുട്ട്
ഇടയ്ക്കിടെ മൂത്രമൊഴിക്കൽ
അകാരണമായ ക്ഷീണം
പെട്ടെന്ന് വയറു നിറഞ്ഞതായി തോന്നുക
അണ്ഡാശയ അർബുദത്തെ ചികിത്സിക്കുമ്പോൾ, നേരത്തെയുള്ള കണ്ടെത്തൽ പ്രധാനമാണ്. കാൻസറിന്റെ ഘട്ടത്തെയും രോഗിയുടെ മൊത്തത്തിലുള്ള ആരോഗ്യത്തെയും ആശ്രയിച്ച് ചികിത്സാ വ്യത്യാസപ്പെടാം. സാധാരണ ചികിത്സാരീതികളിൽ ശസ്ത്രക്രിയ, കീമോതെറാപ്പി ചികിത്സകൾ എന്നിവ ഉൾപ്പെടുന്നു.
പ്രതിരോധവും നേരത്തെയുള്ള കണ്ടെത്തലും ഒരുപോലെ പ്രധാനമാണ്. പതിവ് പരിശോധനകൾ, രോഗലക്ഷണങ്ങളെക്കുറിച്ചുള്ള അവബോധം, കൃത്യസമയത്ത് ഒരു കാൻസർ വിദഗ്ധനെ സമീപിക്കുക എന്നിവയെല്ലാം മാറ്റത്തിന് കാരണമാകും.
65 വയസ്സിനു മുകളിലുള്ള സ്ത്രീകൾക്ക് അണ്ഡാശയ അർബുദം വരാനുള്ള സാധ്യത കൂടുതലാണ്. എല്ലാ കേസുകളിലും പകുതിയും ഈ പ്രായത്തിലുള്ള സ്ത്രീകളിലാണ് സംഭവിക്കുന്നത്. പാരമ്പര്യം മറ്റൊരു അപകട ഘടകമാണെന്ന് വിദഗ്ധർ പറയുന്നു. അണ്ഡാശയ അർബുദത്തിന്റെ ഏകദേശം അഞ്ച് മുതൽ 10 ശതമാനം വരെ കേസുകളും പാരമ്പര്യത്തെ തുടർന്നാണ് ഉണ്ടാകുന്നതെന്നും വിദഗ്ധർ പറയുന്നു.
