നമ്മുടെ ആരോഗ്യം നന്നാക്കാനും മോശമാക്കാനും ഭക്ഷണങ്ങള്‍ക്ക് സാധിയ്ക്കും. ചില പ്രത്യേക ഭക്ഷണവസ്തുക്കള്‍ ആരോഗ്യത്തിന് സഹായിക്കുന്നവയാണ്. ഇതില്‍ ചിലത് വലിപ്പത്തില്‍ കുഞ്ഞനാണെങ്കിലും കാര്യമായ ഗുണം നല്‍കും. ഇത്തരത്തില്‍ ഒന്നാണ് ഫ്‌ളാസ് സീഡുകള്‍. ഇവയിൽ മികച്ച ഫൈബർ, ഒമേഗ -3 ഫാറ്റി ആസിഡുകൾ അടങ്ങിയിട്ടുണ്ട്. ഈ ഫ്ളാക്സ് സീഡ് പതിവായി കഴിക്കുന്നത് വീക്കം, ഹൃദയമിടിപ്പ് എന്നിവ നിയന്ത്രിക്കാൻ സഹായിക്കും. ഹൃദ്രോഗത്തിലേക്ക് നയിക്കുന്ന ഉയർന്ന രക്തസമ്മർദ്ദം ഫലപ്രദമായി നിയന്ത്രിക്കുന്നു. എഎൽഎ എന്ന ഘടകം ട്യൂമറുകളുടെ വളർച്ചയെയും ഇല്ലാതാക്കുന്നു. അമിതഭാരവും കുടവയറുമൊക്കെ കുറയ്ക്കാൻ സഹായിക്കുന്നതാണ് ഫ്ലാക്സ് സീഡ്സ്.
ഫ്ളാക്സ് സീഡ് ഇന്നത്തെ കാലത്ത് പലരും പ്രമേഹ നിയന്ത്രണത്തിന് ഉപയോഗിയ്ക്കുന്ന ഒന്നാണ്. പ്രമേഹത്തിന് മാത്രമല്ല, പല ആരോഗ്യപ്രശ്‌നങ്ങള്‍ക്കും ഇത് നല്ലൊരു മരുന്നാണ്. എന്നാല്‍ വേണ്ട രീതിയില്‍ കഴിച്ചില്ലെങ്കില്‍ ഫ്ളാക്സ് സീഡുകള്‍ ഗുണം നല്‍കില്ലെന്ന് മാത്രമല്ല, ഇത് അപകടകരമാകുകയും ചെയ്യുന്നു. പ്രത്യേകിച്ചും ചില രോഗങ്ങളുള്ളവര്‍ക്ക്. ഇത് ഇവര്‍ക്ക് കൃത്യമായി കഴിയ്ക്കാന്‍ വഴികളുമുണ്ട്. ഇപ്രകാരം കഴിച്ചാല്‍ ഫ്ളാക്സ് സീഡ് അഥവാ ചണവിത്ത് ദോഷം വരുത്തുന്നില്ലെന്നതാണ് വാസ്തവം. ഇതിന് ഏറെ ആരോഗ്യഗുണങ്ങള്‍ ഉണ്ടാകുകയും ചെയ്യും.
ഫൈബര്‍ ദഹിപ്പിയ്ക്കാന്‍ ബുദ്ധിമുട്ടുണ്ടെങ്കില്‍, അതായത് ഐബിഎസ് എന്ന പ്രശ്‌നമുള്ളവര്‍ ഇതൊഴിവാക്കുന്നതാണ് നല്ലത്. എന്തെങ്കിലും കഴിച്ചാലോ സ്‌ട്രെസ് വന്നാലോ ഒക്കെ ഉടന്‍ ടോയ്‌ലറ്റില്‍ പോകേണ്ടി വരുന്നതാണ് ഈ പ്രശ്‌നം. ഇത് ആമാശത്തില്‍ ശരിയായി ദഹിയ്ക്കില്ല. ഇതുപോലെ കുടലിനെ ബാധിയ്ക്കുന്ന അള്‍സറൈറ്റിസ് കൊളൈറ്റിസ്. ക്രോണ്‍സ് ഡിസീസ് എന്നിവയുണ്ടെങ്കിലും ഫ്ളാക്സ് സീഡ് ഒഴിവാക്കുന്നതാണ് നല്ലത്. ഇതുപോലെ തൈറോയ്ഡ് പ്രശ്‌നമെങ്കില്‍ ഇത് പ്രത്യേക രീതിയില്‍ കഴിയ്ക്കണം. ഫ്ളാക്സ് സീഡിലെ തൈറോസൈനേറ്റ് എന്ന വസ്തുവാണ് പ്രശ്‌നമുണ്ടാകുന്നത്. ഇതുപോലെ ഗര്‍ഭാവസ്ഥയില്‍ ഇതൊഴിവാക്കുന്നതാണ് നല്ലത്.
ഇതില്‍ ഫൈറ്റിക്‌ ആസിഡുണ്ട്. ഇത് വൈറ്റമിനുകളും മിനറലുകളും ശരീരം ആഗിരണം ചെയ്യുന്നത് തടയും. ഇത് കഴിയ്ക്കുന്നത് പ്രത്യേക രീതിയില്‍ കഴിയ്ക്കുന്നത് നല്ലതാണ്. ഇത് ഡ്രൈ റോസ്റ്റ് ചെയ്ത് കഴിയ്ക്കാം. ഇതല്ലെങ്കില്‍ കുതിര്‍ത്ത് അരച്ച് കഴിയ്ക്കുന്നതും നല്ലതാണ്. ഇത് മുളപ്പിച്ചോ മൈക്രോഗ്രീന്‍സ് ആക്കിയോ കഴിച്ചാല്‍ ഏറെ നല്ലതാണ്. ഇത് എട്ടു മണിക്കൂര്‍ കുതിര്‍ത്ത ശേഷം കിഴി കെട്ടി വച്ചാല്‍ ഇത് മുളയ്ക്കും. ഇത് പാകം ചെയ്തു കഴിയ്ക്കാം. മുള വന്നാല്‍ ഇത് അതേ തുണിയില്‍ തന്നെ നനച്ച് സൂര്യപ്രകാശം കിട്ടുന്ന ജനലിലോ മറ്റോ വയ്ക്കാം. ഇത് ചെറിയ ചെടിയായി വരുമ്പോള്‍ എടുത്ത് പാകം ചെയ്ത് കഴിയ്ക്കാം.
ഇവ ശരീരം പെട്ടെന്ന് വലിച്ചെടുക്കാന്‍ ഇതിനൊപ്പം കൊഴുപ്പ് കൂടി കഴിയ്ക്കാം. തൈരിലോ കൊഴുപ്പുള്ള പാലിലോ ഇത് ചേര്‍ത്ത് കഴിയ്ക്കുന്നത് നല്ലതാണ്. ഇത് കുറേ ഒരുമിച്ച് കഴിയ്ക്കരുത്. ദിവസം 1 ടേബിള്‍സ്പൂണ്‍ കഴിയ്ക്കണമെങ്കില്‍ രാവിലെ അര ടീസ്പൂണ്‍, പിന്നീട് വൈകീട്ട് ഇത് അര ടീസ്പൂണ്‍ എന്നിങ്ങനെ കഴിയ്ക്കാം. മാക്‌സിമം 2 ടേബിള്‍സ്പൂണ്‍ വരെ ഇത് കഴിയ്ക്കാം ഇത് കഴിയ്ക്കുമ്പോള്‍ അസിഡിറ്റിയും വയറുവേദനയും മറ്റുമുണ്ടെങ്കില്‍ നിങ്ങളുടെ ശരീരത്തിന് ഫ്ളാക്സ് സീഡുകളെ ദഹിപ്പിയ്ക്കാന്‍ സാധിയ്ക്കുന്നില്ലെന്നതാണ് അര്‍ത്ഥം. ഇത് വേവിച്ചു കഴിയ്ക്കാം. ഇതുപോലെ ഇത് കഴിയ്ക്കുമ്പോള്‍ ഒപ്പം ധാരാളം വെള്ളം കൂടി കുടിയ്ക്കണം. ഇത് വയറ്റിലെത്തി ജലം വലിച്ചെടുത്ത് വീര്‍ത്ത് ആമാശയം ക്ലീന്‍ ചെയ്യുന്ന ചൂലു പോലെ പ്രവര്‍ത്തിയ്ക്കുന്നു.
