മിനാ. ഇന്ന് അറഫാ സംഗമം. ഹജ്ജിനെത്തിയ എല്ലാ തീര്‍ഥാടകരും ഇന്ന് ഉച്ചയ്ക്ക് ശേഷം അറഫയില്‍ സംഗമിക്കും. ഇന്ന് രാത്രി മുസ്ദലിഫയില്‍ തങ്ങുന്ന തീര്‍ഥാടകര്‍ നാളെ രാവിലെയാണ് മിനായില്‍ തിരിച്ചെത്തുക.
ഹജ്ജിന്‍റെ ഏറ്റവും പ്രധാന കര്‍മമായ അറഫാ സംഗമത്തിനായുള്ള തയ്യാറെടുപ്പിലാണ് തീര്‍ഥാടകര്‍. ഇന്ന് ഉച്ചയോടെ ഇരുപത് ലക്ഷത്തിലധികം വരുന്ന തീര്‍ഥാടകര്‍ അറഫയില്‍ സംഗമിക്കും. ഹജ്ജിനെത്തിയ എല്ലാ തീര്‍ഥാടകരും ഒരേ സമയം അനുഷ്ഠിക്കുന്ന ഏക കര്‍മം. പ്രാര്‍ഥനയ്ക്ക് ഉത്തരം ലഭിക്കുമെന്ന് അല്ലാഹു ഉറപ്പ് നല്കിയ കര്‍മം. ഇങ്ങിനെ നിരവധി പ്രത്യേകതകള്‍ അറഫാ സംഗമത്തിനുണ്ട്. മിനായില്‍ നിന്നും ഏതാണ്ട് 15 കിലോമീറ്റര്‍ അകലെയുള്ള അറഫയിലേക്ക് ബസുകളിലും മെട്രോയിലുമായാണ് തീര്‍ഥാടകര്‍ പോകുന്നത്. അറഫയിലെ മസ്ജിദു നമിറയില്‍ ഇന്ന് നടക്കുന്ന നമസ്കാരത്തിനും ഖുതുബയ്ക്കും ശൈഖ് മാഹിര്‍ അല്‍ മുഐഖിലി’ നേതൃത്വം നല്കും. പ്രവാചകന്‍ തന്‍റെ വിടവാങ്ങല്‍ പ്രസംഗം നടത്തിയ ജബല്‍ റഹ്മ എന്ന മല തീര്‍ഥാടകരെ കൊണ്ട് നിറയും. മക്കയിലെ വിവിധ ആശുപത്രികളില്‍ ചികിത്സയില്‍ കഴിയുന്ന തീര്‍ഥാടകരെ ആംബുലന്‍സുകളില്‍ അറഫയില്‍ എത്തിക്കും.
അറഫയാണ് ഹജ്ജ് എന്ന പ്രവാചക വചനം ഉള്‍ക്കൊണ്ട് കൊണ്ട് ഹജ്ജിനെത്തിയ എല്ലാ തീര്‍ഥാടകരെയും ഇന്ന് അറഫയില്‍ എത്തിക്കാനുള്ള സംവിധാനങ്ങള്‍ സൌദി ഭരണകൂടം ചെയ്തിട്ടുണ്ട്. ഇന്ന് പകല്‍ മുഴുവന്‍ അറഫയില്‍ പാപമോചന പ്രാര്‍ഥനകളിലും മറ്റും മുഴുകുന്ന തീര്‍ഥാടകര്‍ സൂര്യന്‍ അസ്തമിച്ച ശേഷം 15 കിലോമീറ്റര്‍ അകലെയുള്ള മുസ്ദലിഫയിലേക്ക് നീങ്ങും. മുസ്ദലിഫയിലെ തുറന്ന മൈതാനത്താണ് ഇന്ന് രാത്രി തീര്‍ഥാടകര്‍ കഴിയുക. മിനായിലെ ജംറകളില്‍ എറിയാനുള്ള കല്ലുകള്‍ മുസ്ദലിഫയില്‍ നിന്ന് ശേഖരിക്കും. നാളെ രാവിലെ മിനായില്‍ തിരിച്ചെത്തി ഹാജിമാര്‍ ജംറകളില്‍ കല്ലേറ് കര്‍മം ആരംഭിക്കും. ബലിപെരുന്നാള്‍ ദിവസമായ നാളെയാണ് ഹജ്ജ് തീര്‍ഥാടകര്‍ക്ക് ഏറ്റവും കൂടുതല്‍ കര്‍മങ്ങള്‍ അനുഷ്ടിക്കാനുള്ളത്.
