ശബരിമല.നടന്‍ ദിലീപ് ശബരിമലയിലെത്തി ദര്‍ശനം നടത്തി. വെള്ളിയാഴ്ച രാവിലെ എട്ട് മണിയോടെയാണ് നടന്‍ സന്നിധാനത്തെത്തിയത്.
വ്യാഴാഴ്ച രാത്രി തന്നെ അദ്ദേഹം ശബരിമലയില്‍ എത്തിയിരുന്നു. തുടര്‍ന്ന് ദേവസ്വം ബോര്‍ഡ് ഗസ്റ്റഹൗസില്‍ തങ്ങി രാവിലെ ദര്‍ശനം നടത്തി. ഏപ്രിലിലും ദിലീപ് ശബരിമലയില്‍ ദര്‍ശനത്തിനെത്തിയരുന്നു.
കഴിഞ്ഞ ദിവസമായിരുന്നു മണ്ഡല മകരവിളക്ക് തീര്‍ത്ഥാടനത്തിനായി ശബരിമല നട തുറന്നത്. ക്ഷേത്രം തന്ത്രി കണ്ഠരര് രാജീവരുടെ സാന്നിധ്യത്തില്‍ മേല്‍ശാന്തി എന്‍. പരമേശ്വരന്‍ നമ്ബൂതിരിയാണ് നട തുറന്നത്. കൊറോണ മഹാമാരിക്ക് ശേഷം നിയന്ത്രണങ്ങള്‍ ഒഴിവാക്കിയ ആദ്യ തീര്‍ത്ഥാടന കാലമായതിനാല്‍ വലിയ ഭക്തജന തിരക്കാണ് സന്നിധാനത്ത് അനുഭവപ്പെടുന്നത്.
പ്രതിദിനം 60,000ത്തോളം ഭക്തര്‍ ദര്‍ശനത്തിനായി വെര്‍ച്വല്‍ ക്യൂ വഴി ബുക്ക് ചെയ്തിട്ടുണ്ട്. അവധി ദിവസങ്ങളില്‍ ഇത് 80,000ത്തിന് മുകളിലാണ്. തീര്‍ത്ഥാടകര്‍ക്ക് തൃപ്തിയോടെ തൊഴുതിറങ്ങാനുള്ള സൗകര്യം ഒരുക്കുകയാണ് ദൗത്യമെന്ന് എഡിജിപി എംആര്‍ അജിത്ത് കുമാര്‍ പ്രതികരിച്ചു.
