തിരുവനന്തപുരം ആറ്റിങ്ങലില്‍ പ്രായപൂര്‍ത്തിയാകാത്ത പെണ്‍കുട്ടിയുടെ നഗ്‌നവീഡിയോ പകര്‍ത്തി സോഷ്യല്‍ മീഡിയയിലൂടെ പ്രചരിപ്പിച്ച സ്വകാര്യ ബസ് ഡ്രൈവര്‍ അറസ്റ്റില്‍.
വടക്കന്‍സ് എന്ന പേരിലുള്ള ബസിന്റെ ഡ്രൈവറായ ചെമ്മരുതി പാലച്ചിറ തച്ചോട് പട്ടരുമുക്ക് ആകാശ്ഭവനില്‍ എസ്.ആകാശ് (നന്ദു-24) ആണ് അറസ്റ്റിലായത്.
സ്‌കൂള്‍ വിദ്യാര്‍ഥിയായ പെണ്‍കുട്ടിയെ പ്രണയം നടിച്ച് വശത്താക്കിയ പ്രതി കുട്ടിയുടെ നഗ്‌നവീഡിയോ പകര്‍ത്തുകയും മറ്റുള്ളവര്‍ക്ക് സമൂഹമാധ്യമങ്ങളിലൂടെ കൈമാറുകയും ചെയ്യുകയായിരുന്നുവെന്ന് പോലീസ് പറഞ്ഞു. പെണ്‍കുട്ടിയുടെ പരാതിയെത്തുടര്‍ന്ന് ആറ്റിങ്ങല്‍ പോലീസ് കേസെടുത്തതോടെ പ്രതി ഒളിവില്‍പ്പോയി. പ്രതിയുടെ മൊബൈല്‍ ഫോണില്‍നിന്ന് നിരവധി സ്ത്രീകളുമായും പ്രായപൂര്‍ത്തിയാകാത്ത പെണ്‍കുട്ടികളുമായും ചാറ്റിങ് നടത്തിയതിന്റെ വിവരങ്ങള്‍ പോലീസിന് ലഭിച്ചിട്ടുണ്ട്. ഇതുമായി ബന്ധപ്പെട്ടുള്ള അന്വേഷണം പുരോഗമിക്കുകയാണ്.
