Advertisement
തിരുവനന്തപുരം: മുതിർന്ന സിപിഎം നേതാവ് പി.കെ.ഗുരുദാസന്റെ ജീവിതം ഇനി പാർട്ടി നിർമിച്ച വീട്ടിൽ. തിരുവനന്തപുരം കാരേറ്റുള്ള പി.കെ.ഗുരുദാസൻറെ സ്ഥലത്ത് സിപിഎം കൊല്ലം ജില്ലാ കമ്മിറ്റിയാണ് വീടു വച്ചുനൽകിയത്.
ഗുരുദാസനെ സ്നേഹിക്കുന്ന നേതാക്കളും പാർട്ടി പ്രവർത്തകരും ഗൃഹപ്രവേശന ചടങ്ങിനെത്തി. കുടുംബത്തിനൊപ്പം സിപിഎം സംസ്ഥാന സെക്രട്ടറി എം.വി.ഗോവിന്ദനും പാർട്ടി നേതാക്കളും വീട്ടുകാരായിത്തന്നെ പങ്കെടുത്തു.
കാരേറ്റ് പേടികുളത്തുള്ള ഗുരുദാസൻറെ 10 സെൻറ് സ്ഥലത്താണു പുതിയ വീട്. ജനങ്ങൾക്കായി ജീവിതം മാറ്റിവച്ച ഗുരുദാസന്, പാർലമെന്ററി ജീവിതത്തിൽനിന്നും സംസ്ഥാന നേതൃത്വത്തിൽനിന്നും പടിയിറങ്ങുമ്പോൾ താമസിക്കാൻ സ്വന്തമായി വീടു പോലുമില്ലായിരുന്നു. 2011ൽ മന്ത്രിപദമൊഴിഞ്ഞപ്പോൾ മുതൽ എകെജി സെൻററിനു സമീപത്തുള്ള പാർട്ടി ഫ്ലാറ്റിലാണ് 88 വയസ്സുകാരനായ ഗുരുദാസൻ താമസിച്ചിരുന്നത്.
Advertisement
