തിരുവനന്തപുരം: മുതിർന്ന കോൺഗ്രസ് നേതാവ് രമേശ് ചെന്നിത്തലയുടെയും അനിതാ രമേശിന്റെയും ഇളയ മകൻ രമിത് വിവാഹിതനായി. ബഹ്റൈനിൽ താമസമാക്കിയ ജോൺ കോശിയുടെയും ഷൈനി ജോണിന്റെയും മകൾ ജൂനിറ്റയാണ് വധു.
തിരുവനന്തപുരം നാലാഞ്ചിറയിലെ ഗിരിദീപം ഓഡിറ്റോറിയത്തിൽ വെച്ചായിരുന്നു വിവാഹം. കേരളത്തിലെ രാഷ്ട്രീയ സാമൂഹിക സാംസ്കാരിക രംഗത്തെ പ്രമുഖർ വിവാഹ ചടങ്ങിൽ പങ്കെടുത്തു. ഗവർണർ ആരിഫ് മുഹമ്മദ് ഖാൻ, മുഖ്യമന്ത്രി പിണറായി വിജയൻ, പ്രതിപക്ഷ നേതാവ് വി.ഡി.സതീശൻ, മുൻ മുഖ്യമന്ത്രി ഉമ്മൻ ചാണ്ടി തുടങ്ങി നിരവധിപേ‌ർ വധൂ വരൻമാർക്ക് ആശംസകളറിയിക്കാനെത്തി.
തിരുവനന്തപുരം മാർ ബസേലിയോസ് എൻജിനീയറിങ് കോളജിലാണ് രമിത്തും ജൂനിറ്റയും പഠിച്ചത്. പഠനകാലയളവിലെ സൗഹൃദമാണ് പ്രണയത്തിലേക്കും വിവഹാത്തിലേക്കും എത്തിയത്. ഇൻകംടാക്സ് മംഗലാപുരം ഡെപ്യൂട്ടി കമ്മീഷണറാണ് രമിത്ത്. ബഹ്റൈനിൽ കിംസ് ഹോസ്പിറ്റൽ ഗ്രൂപ്പ് ഐടി വിഭാഗത്തിലാണ് ജൂനിറ്റ ജോലി ചെയ്യുന്നത്.
