തൃശൂർ: അന്തരിച്ച നടൻ ഇന്നസെന്റിനെ അവസാനമായി ഒരുനോക്കു കാണാൻ നിറകണ്ണുകളോടെ നടി കാവ്യ മാധവനെത്തി. മൃതദേഹത്തിനരികെയെത്തിയപ്പോൾ നിയന്ത്രണം വിട്ട് അവർ പൊട്ടിക്കരഞ്ഞു. അന്ത്യകർമങ്ങളിലും കാവ്യയും ഭർത്താവ് ദിലീപും പങ്കാളികളായി.
കാവ്യയുമായും ദിലീപുമായും വളരെ അടുത്ത ബന്ധമാണ് ഇന്നസെന്റിനുണ്ടായിരുന്നത്. അവസാന നിമിഷങ്ങളിൽ ദിലീപ് ആശുപത്രിയിൽ ഒപ്പമുണ്ടായിരുന്നു.’ഓർമയുള്ള കാലം വരെ എന്നും എനിക്കൊപ്പം ഞങ്ങൾക്കൊപ്പം നിങ്ങൾ ഉണ്ടാകും’ എന്ന് ദിലീപ് സമൂഹമാധ്യമത്തിൽ കുറിച്ചിരുന്നു.
‘വാക്കുകൾ മുറിയുന്നു… കണ്ണുകളിൽ ഇരുട്ടു മൂടുന്നു… ആശുപത്രിയിൽ കാത്തിരിക്കുമ്പോൾ ഡോക്ടർ വന്നു പറയുന്ന വാക്കുകൾ കേട്ട്… ആരായിരുന്നു ഇന്നസെന്റ് എന്ന ആ വലിയ മനുഷ്യൻ എനിക്ക്…. അച്ഛനെപ്പോലെ സഹോദരനെ പോലെ ഒരു വഴികാട്ടിയെ പോലെ എന്നും ജീവിതത്തിൽ എനിക്കൊപ്പം ഉണ്ടായിരുന്ന ആ മനുഷ്യൻ വിട പറഞ്ഞിരിക്കുന്നു… കലാരംഗത്ത് എനിക്ക് ഒരു വിലാസം തന്നത് ആ ശബ്ദമായിരുന്നു, പിന്നീട് സിനിമയിലെത്തിയപ്പോഴും പിൻബലമായത് അദ്ദേഹത്തിന്റെ കരുതൽ ആയിരുന്നു, ജീവിതത്തിലെ പ്രതിസന്ധികളിൽ അദ്ദേഹത്തിന്റെ ആശ്വാസവാക്കുകൾ കരുത്തായിരുന്നു… ഇനിയാ ശബ്ദവും രൂപവും, ആശ്വാസ വാക്കുകളും നിലച്ചു എന്നറിയുമ്പോൾ… വാക്കുകൾ മുറിയുന്നു… ഇല്ല, ഇന്നസെന്റ് ഏട്ടാ നിങ്ങൾ എങ്ങോട്ടും പോകുന്നില്ല, ഓർമ്മയുള്ള കാലം വരെ എന്നും എനിക്കൊപ്പം ഞങ്ങൾക്കൊപ്പം നിങ്ങൾ ഉണ്ടാവും’ – എന്നായിരുന്നു ദിലീപന്‍റെ കുറിപ്പ്.
