തൃശൂര്‍ . കെഎസ്ആർടിസി ബസിൽ യുവതിക്ക് നേരെ നഗ്നതാ പ്രദർശനം നടത്തി അറസ്റ്റിലായ സവാദിന് സ്വീകരണം നൽകിയ നടപടിയെ രൂക്ഷമായി വിമർശിച്ച് പരാതിക്കാരിയായ നന്ദിത. പ്രതിക്ക് സ്വീകരണം നൽകിയ നടപടി ലജ്ജിപ്പിക്കുന്നു. മാലയിട്ട് സ്വീകരിക്കാൻ മാത്രം എന്ത് സത്കർമ്മമാണ് സവാദ് ചെയ്തതെന്നും നന്ദിത ചോദിച്ചു.
സവാദിന് ജാമ്യം കിട്ടിയത് നിയമവ്യവസ്ഥയുടെ ഭാഗമായാണ്. പക്ഷേ സ്വീകരണം നൽകിയ നടപടി ഇത്തരം അതിക്രമങ്ങളെ അനുകൂലിക്കുന്ന നിലപാടിന് തുല്യമാണ്. സംഭവത്തിന് ശേഷം പ്രതിക്ക് പൂമാലയും തനിക്ക് കല്ലേറുമെന്ന നിലയാണ് ഉള്ളത്. ജോലി ചെയ്യാനാവുന്നില്ലെന്നും സംഭവത്തിന് ശേഷം സോഷ്യൽ മീഡിയയിലൂടെ തന്നെ വേട്ടയാടുകയാണെന്നും നന്ദിത.
സ്ത്രീകളെ ആക്രമിക്കുകയും ഇത്തരത്തിൽ അതിക്രമങ്ങൾക്ക് നേതൃത്വം കൊടുക്കുകയും ചെയ്യുന്ന ആളുകളാണ് സവാദിന് ജയിലിൽ സ്വീകരണം നൽകിയത്. ലൈംഗിക അതിക്രമം നടത്തുന്നവർക്കൊപ്പം നിൽക്കുന്ന നിലപാടാണ് സ്വീകരണത്തിന് എത്തിയവരിലൂടെ പ്രകടമായത്. അത് പുരുഷ സമൂഹത്തിന് തന്നെ അപമാനമാണ്. സവാദിനെതിരെ നിയമ പോരാട്ടം തുടരുമെന്നും നന്ദിത പറഞ്ഞു. കേസിൽ അറസ്റ്റിലായിരുന്ന സവാദ് കഴിഞ്ഞ ദിവസമാണ് ജാമ്യത്തിൽ പുറത്തിറങ്ങിയത്. സവാദിനെ മാലയിട്ട് സ്വീകരിച്ച സംഭവത്തിനെതിരെ സോഷ്യല്‍ മീഡിയയില്‍ പ്രതികരണം രൂക്ഷമാണ്.
