Advertisement
കോഴിക്കോട്:
മഹാരാജാസ് കോളജിന്റെ പേരിൽ വ്യാജ തൊഴിൽ പരിചയ സർട്ടിഫിക്കറ്റ് തയ്യാറാക്കിയ കേസിൽ പിടിയിലായ കെ വിദ്യയെ ഇന്ന് കോടതിയിൽ ഹാജരാക്കും. കോഴിക്കോട് നിന്നാണ് ഇന്നലെ പാലക്കാട് അഗളി പോലീസ് വിദ്യയെ കസ്റ്റഡിയിൽ എടുത്തത്. കേസ് എടുത്തതിന് പിന്നാലെ 15 ദിവസത്തെ ഒളിവ് ജീവിതത്തിനിടെയായിരുന്നു അറസ്റ്റ്.
സുഹൃത്തിന്റെ വീട്ടിൽ നിന്ന് മടങ്ങുന്നതിനിടെയാണ് വിദ്യയെ പോലീസ് പിടികൂടുന്നത്. ടവർ ലൊക്കേഷൻ പിന്തുടർന്ന് എത്തിയാണ് പോലീസ് വിദ്യയെ കുടുക്കിയത്. മേപ്പയ്യൂരിലെ കുട്ടോത്ത് എന്ന സ്ഥലത്ത് നിന്നാണ് വിദ്യ പിടിയിലായത്. വിദ്യയെ പാലക്കാട് എത്തിച്ച ശേഷം അറസ്റ്റ് രേഖപ്പെടുത്തി. ഇന്ന് രാവിലെ 11 മണിക്ക് വിദ്യയെ പാലക്കാട് മണ്ണാർക്കാട് കോടതിയിൽ ഹാജരാക്കുമെന്നാണ് വിവരം.
Advertisement
