2023 ആഗസ്റ്റ് 13 ഞായർ
കേരളീയം
🙏നെഹ്റു ട്രോഫി വള്ളംകളിയില്‍ വീയപുരം ചുണ്ടന്‍ ജേതാവായി. ചമ്പക്കുളം ചുണ്ടനാണ് രണ്ടാമതായി ഫിനിഷ് ചെയ്തത്. നടുഭാഗം ചുണ്ടന്‍ മൂന്നാമതും കേരള പൊലീസ് തുഴഞ്ഞ കാട്ടില്‍ തെക്കെതില്‍ നാലാമതും ഫിനിഷ് ചെയ്തു.
🙏ഓണക്കാലത്തേക്കു ബെംഗളുരുവില്‍നിന്ന് കേരളത്തിലേക്ക് കര്‍ണാടക കൂടുതല്‍ ബസ് സര്‍വീസ് നടത്തും. കര്‍ണാടക മുഖ്യമന്ത്രി സിദ്ധരാമയ്യയാണ് നിര്‍ദേശം നല്‍കിയത്.
🙏താനൂര്‍ കസ്റ്റഡി മരണക്കേസില്‍ ക്രൈംബ്രാഞ്ച് കൊലക്കുറ്റം ചുമത്തി. കേസ് സിബിഐയ്ക്കു വിടാന്‍ സര്‍ക്കാര്‍ തീരുമാനിച്ചതോടെയാണ് നടപടി. അസ്വാഭാവിക മരണത്തിനാണ് കേസെടുത്തിരുന്നത്.
🙏ആനകള്‍ക്കായി മള്‍ട്ടി സ്പെഷ്യാലിറ്റി ആശുപത്രിയും സുഖ ചികിത്സാ കേന്ദ്രവും തുടങ്ങുമെന്ന് മൃഗസംരക്ഷണ വകുപ്പ് മന്ത്രി ജെ. ചിഞ്ചുറാണി. ഇന്ത്യന്‍ വെറ്ററിനറി അസോസിയേഷനും മൃഗസംരക്ഷണ വകുപ്പും സംയുക്തമായി സംഘടിപ്പിച്ച ലോക ഗജദിനാചരണം കൊല്ലം പുത്തന്‍കുളം ആനത്താവളത്തില്‍ ഉദ്ഘാടനം ചെയ്യുകയായിരുന്നു മന്ത്രി.
🙏പൊതുപ്രവര്‍ത്തകര്‍ സാമൂഹ്യനന്മയ്ക്കായി സര്‍വവും ത്യജിക്കാന്‍ തയ്യാറാകണമെന്ന് ഗവര്‍ണര്‍ ആരിഫ് മുഹമ്മദ് ഖാന്‍. തൃശൂരില്‍ സമര്‍പ്പണ രാമായണ ഫെസ്റ്റില്‍ പ്രസംഗിക്കുകയായിരുന്നു ഗവര്‍ണര്‍.
🙏ട്രെയിനിന്റെ ചവിട്ടുപടിയില്‍ ഇരുന്നു യാത്ര ചെയ്യുന്നതിനിടെ പുഴയില്‍ വീണ യാത്രക്കാരനുവേണ്ടി തെരച്ചില്‍. മംഗലാപുരത്തുനിന്നും തിരുവനന്തപുരത്തേക്ക് പോവുകയായിരുന്ന പരശുറാം എക്സ്പ്രസ് വൈക്കം വെള്ളൂര്‍ പിറവം റോഡ് റെയില്‍ പാലത്തില്‍ എത്തിയപ്പോള്‍ യാത്രക്കാരന്‍ മൂവാറ്റുപുഴ ആറിലേക്കു വീഴുകയായിരുന്നു.
🙏മലപ്പുറം മേലാറ്റൂരിലെ പൊലീസ് സ്റ്റേഷന്‍ ബോംബുവച്ചു തകര്‍ക്കുന്ന റീല്‍ നിര്‍മിച്ചു പ്രചരിപ്പിച്ച അഞ്ചു യുവാക്കളെ അറസ്റ്റു ചെയ്തു. കരുവാരക്കുണ്ട് പുന്നക്കാട് സ്വദേശികളായ മുഹമ്മദ് റിയാസ്, സല്‍മാനുല്‍ ഫാരിസ്, മുഹമ്മദ് ജാസിം, സലിം ജിഷാദിയന്‍, മുഹമ്മദ് ഫവാസ് എന്നിവരാണ് പിടിയിലായത്.
🙏എ ഐ സാങ്കേതിക വിദ്യയിലൂടെ കോഴിക്കോട് സ്വദേശിയുടെ പണം തട്ടിയെടുത്തെന്ന കേസില്‍ പ്രതി ഗുജറാത്ത് ഉസ്മാന്‍പുര സ്വദേശി കൗശല്‍ ഷായാണെന്നു പോലീസ്. കോഴിക്കോട് പാലാഴി സ്വദേശി രാധാകൃഷ്ണന്‍ കഴിഞ്ഞ മാസമാണ് എഐ സാങ്കേതിക വിദ്യ ഉപയോഗിച്ചുള്ള തട്ടിപ്പിനിരയായത്.
🙏പനിയെ തുര്‍ന്ന് രക്ത പരിശോധനക്കെത്തിയ ഏഴു വയസുകാരിക്ക് പേവിഷബാധക്കുള്ള കുത്തിവയ്പു നല്‍കി. എറണാകുളം അങ്കമാലി താലൂക്ക് ആശുപത്രിയിലാണ് സംഭവം.
ദേശീയം
🙏മണിപ്പൂരിനെ കോണ്‍ഗ്രസ് പുനര്‍നിര്‍മിക്കുമെന്നു രാഹുല്‍ഗാന്ധി എംപി. മണിപ്പൂരിലേതുപോലുള്ള ഒരു ദുരിതമേഖല താന്‍ ഇതുവരെ കണ്ടിട്ടില്ല. പല കലാപബാധിത പ്രദേശങ്ങളിലും പോയിട്ടുണ്ട്. മണിപ്പൂര്‍ രക്തപങ്കിലമാണ്. അനേകം സ്ത്രീകളെ ബലാത്സംഗം ചെയ്തു. വയനാട്ടില്‍ കോണ്‍ഗ്രസ് സമ്മേളനത്തില്‍ പ്രസംഗിക്കുകയായിരുന്നു അദ്ദേഹം.
🙏കള്ളപ്പണക്കേസില്‍ അറസ്റ്റിലായ തമിഴ്നാട് മന്ത്രി സെന്തില്‍ ബാലാജിക്കെതിരെ എന്‍ഫോഴ്സ്മെന്റ് ചെന്നൈ കോടതിയില്‍ കുറ്റപത്രം സമര്‍പ്പിച്ചു. മൂവായിരത്തിലേറെ പേജുള്ള കുറ്റപത്രമാണ് സമര്‍പ്പിച്ചത്.
🙏സൂററ്റില്‍ ഹെല്‍മെറ്റ് ധരിച്ച് അഞ്ചംഗ സംഘം ബാങ്ക് കൊള്ളയടിച്ചു. രണ്ടു ബൈക്കുകളിലായി എത്തിയ സംഘമാണ് സച്ചിന്‍ ഏരിയയിലെ ബാങ്ക് ഓഫ് മഹാരാഷ്ട്രയുടെ വാന്‍സ് ശാഖയില്‍നിന്ന് 14 ലക്ഷം രൂപ കവര്‍ന്നത്.
🙏തമിഴ് സിനിമ താരം സത്യരാജിന്റെ അമ്മ നതാംബാള്‍ കലിംഗരായര്‍ അന്തരിച്ചു. 94 വയസായിരുന്നു.
🙏ഡിജിറ്റല്‍ പേഴ്സണല്‍ ഡാറ്റാ പ്രൊട്ടക്ഷന്‍ ബില്ലിന് രാഷ്ട്രപതിയുടെ അംഗീകാരം. വ്യക്തികളുടെ ഡിജിറ്റല്‍ ഡാറ്റ ദുരുപയോഗിച്ചാല്‍ 250 കോടി രൂപ വരെ പിഴ ചുമത്താന്‍ അധികാരം നല്‍കുന്ന നിയമമാണിത്.
അന്തർദേശീയം
🙏പാരിസിലെ ഈഫല്‍ ടവറില്‍ ബോംബു ഭീഷണി. മൂന്നു നിലകളില്‍നിന്ന് ആളുകളെ ഒഴിപ്പിച്ചു പരിശോധന നടത്തിയെങ്കിലും ഒന്നും കണ്ടുകിട്ടിയില്ല.
🙏പാക്കിസ്ഥാനില്‍ തെരഞ്ഞെടുപ്പിനു മുന്നോടിയായി സെനറ്റര്‍ അന്‍വാര്‍ ഉല്‍ ഹഖ് കാകര്‍ ഇടക്കാല പ്രധാനമന്ത്രിയാകും. പ്രധാനമന്ത്രി ഷെഹ്ബാസ് ഷരീഫും പ്രതിപക്ഷ നേതാവ് രാജാ റിയാസും തമ്മിലുണ്ടാക്കിയ ധാരണയനുസരിച്ചാണ് താത്കാലിക ചുമതല.
കായികം
🙏വെസ്റ്റ് ഇന്‍ഡീസിന് എതിരായ ട്വന്റി 20 പരമ്പരയിലെ നാലാം മത്സരത്തില്‍ ഇന്ത്യക്ക് 9 വിക്കറ്റിന്റെ തകര്‍പ്പന്‍ വിജയം. ഇതോടെ അഞ്ച് മത്സരങ്ങളുള്ള പരമ്പര 2-2 എന്ന നിലയിലായി.
🙏ടോസ് നേടി ബാറ്റിംഗ് തിരഞ്ഞെടുത്ത വെസ്റ്റ് ഇന്‍ഡീസ് മുന്നോട്ടുവെച്ച 179 റണ്‍സ് വിജയലക്ഷ്യം 17 ഓവറില്‍ ഒരു വിക്കറ്റ് മാത്രം നഷ്ടപ്പെടുത്തി ഇന്ത്യ നേടുകയായിരുന്നു.
🙏ഏഷ്യന്‍ ചാമ്പ്യന്‍സ് ട്രോഫി ഹോക്കിയില്‍ ജേതാക്കളായി ഇന്ത്യ. അവസാനമിനിറ്റുവരെ ആവേശം നിറഞ്ഞ പോരാട്ടത്തില്‍ മലേഷ്യയെ മൂന്നിനെതിരേ നാല് ഗോളുകള്‍ക്ക് പരാജയപ്പെടുത്തിയാണ് ഇന്ത്യ കിരീടം ചൂടിയത്. ഏഷ്യന്‍ ചാമ്പ്യന്‍സ് ട്രോഫിയിലെ ഇന്ത്യയുടെ നാലാം കിരീടമാണിത്.
