തിരുവനന്തപുരം.കിളിമാനൂർ റേഡിയോ ജോക്കി രാജേഷ് വധക്കേസിൽ പ്രതികൾക്ക് ഇന്ന് ശിക്ഷ
വിധിക്കും. രണ്ടും മൂന്നും പ്രതികളായ മുഹമ്മദ് സാലിഹ്,അപ്പുണ്ണി എന്നിവരെയാണ് കുറ്റക്കാരെന്ന് തിരുവനന്തപുരം ഒന്നാം അഡീഷണൽ സെഷൻസ് കോടതി കണ്ടെത്തിയത്.ഒന്നാം പ്രതി അബ്ദുൽ
സത്താറിനെ ഇത് വരെയും അറസ്റ്റ് ചെയ്തിട്ടില്ല.
2018 മാർച്ച് 27ന് മടവൂർ ജംഗ്ഷനിലുള്ള റെക്കാഡിംഗ് സ്റ്റുഡിയോയിൽ വച്ചാണ് രാജേഷ് കൊല്ലപ്പെട്ടത്.സംസ്ഥാനത്തെ ആദ്യത്തെ വിദേശ ക്വട്ടേഷൻ കൊലപാതകമായിരുന്നു അത്.ഓച്ചിറ സ്വദേശിയും ഖത്തറിലെ വ്യവസായിയുമായ സത്താറിന്റെ മുൻ ഭാര്യയും നൃത്താദ്ധ്യാപികയുമായ യുവതിയുമായി രാജേഷിനുണ്ടായിരുന്ന അടുപ്പമാണ് കൊലപാതകത്തിലേക്കു നയിച്ചത്.
വിശ്വസ്തനായ അലിബായ് എന്ന മുഹമ്മദ് സാലിഹിനു സത്താർ വിദേശത്തു വെച്ച് ക്വട്ടേഷൻ നൽകി.അബ്ദുൽ സാലിഹും,
കായംകുളത്തെ ക്വട്ടേഷൻ സംഘതലവൻ അപ്പുണ്ണിയും ചേർന്ന് നടത്തിയ കൊലപാതകമെന്നായിരുന്നു കേസ്.
പതിനൊന്നു പ്രതികളെ പോലീസ് അറസ്റ്റ് ചെയ്തു.കേസിലെ രണ്ടാം പ്രതിയായ മുഹമ്മദ് സാലിഹ് മൂന്നാം പ്രതി അപ്പുണ്ണി എന്നിവർ കുറ്റക്കാരെന്നാണ് കോടതി കണ്ടെത്തിയത്.
മറ്റു ഒൻപതു പ്രതികളെയും വെറുതെ വിട്ടു.
വിദേശത്തു തുടരുന്ന കേസിലെ ഒന്നാം പ്രതി സത്താറിനെ ഇത് വരെയും അറസ്റ്റ് ചെയ്യാൻ
കഴിഞ്ഞിട്ടില്ല.പ്രോസിക്യൂട്ടർ മാറിയതിനെ തുടർന്നു വീണ്ടും വിചാരണ നടത്തിയതും,
മുഖ്യ സാക്ഷി കുട്ടൻ മൊഴി മാറ്റിയതും
തിരിച്ചടിയായിരുന്നു.വെറുതെ വിട്ട ഒൻപത് പ്രതികളുടെ കേസിലെ പങ്ക് തെളിയിക്കാൻ കഴിയാതെ പോയത് പ്രോസിക്യൂഷന്‍ വീഴ്ചയെന്നാണ് ആരോപണം.
