2023 ആഗസ്റ്റ് 16 ബുധൻ
🌴 കേരളീയം 🌴
🙏പുതുപ്പള്ളി ഉപതെരഞ്ഞെടുപ്പിൽ
ഇടത് മുന്നണി സ്ഥാനാർത്ഥി ജെയ്ക്ക് സി തോമസ് ഇന്ന് രാവിലെ 11ന് കോട്ടയം ആർ ഡി ഒ മുമ്പാകെ നാമനിർദ്ദേശ പത്രിക സമർപ്പിക്കും.
🙏 പുതുപ്പള്ളി ഉപതെരഞ്ഞെടുപ്പിൽ ഇടത് മുന്നണിയുടെ മണ്ഡലം തിരഞ്ഞെടുപ്പ് കൺവൻഷൻ വൈകിട്ട് 4ന് മണർകാട്ട് സി പി എം സംസ്ഥാന സെക്രട്ടറി എംവി ഗോവിന്ദൻ ഉദ്ഘാടനം ചെയ്യും.
🙏 മുഖമന്ത്രിയുടെ മകൾ വീണ വിജയന്റെ ഐടി കരാര്‍ കമ്പനി ഇപ്പോഴില്ലെന്നും വ്യാജപ്രചാരണങ്ങളാണു നടക്കുന്നതെന്നും സിപിഎം സംസ്ഥാന സെക്രട്ടറി എം.വി. ഗോവിന്ദന്‍. സംസ്ഥാന സെക്രട്ടേറിയറ്റ് വ്യക്തമായ വിശദീകരണം നല്‍കിയിട്ടുണ്ട്.
🙏മാത്യു കുഴല്‍ നാടന്‍ എം.എല്‍.എ ഏഴു കോടി രൂപയുടെ ഭൂമി 1.92 കോടി രൂപയ്ക്കു രജിസ്റ്റര്‍ ചെയ്തതടക്കമുള്ള കള്ളപ്പണം വെളുപ്പിക്കലും നികുതി വെട്ടിപ്പും അന്വേഷിക്കണമെന്ന് സി.പി.എം എറണാകുളം ജില്ലാ സെക്രട്ടറി സി.എന്‍. മോഹനന്‍.
🙏 മൂവാറ്റുപുഴയില്‍ അരീക്കല്‍ വെള്ളച്ചാട്ടം കാണാനെത്തിയ സ്ത്രീകളെ കടന്നു പിടിച്ച രണ്ടു പൊലീസുകാരെ നാട്ടുകാര്‍ പിടികൂടി പോലീസില്‍ ഏല്‍പിച്ചു. വെള്ളച്ചാട്ടം കാണാനെത്തി മദ്യപിച്ചു സ്ത്രീകളോട് അപമര്യാദയായി പെരുമാറിയ പോലീസുകാരെ നാട്ടുകാര്‍ മര്‍ദിച്ചിരുന്നു.
🙏കോഴിക്കോട് കൊയിലാണ്ടിയില്‍ എക്സൈസുകാരെയും പൊലീസുകാരെയും ആക്രമിച്ച സംഭവത്തില്‍ മൂന്നുപേര്‍ അറസ്റ്റില്‍. മദ്യവും മയക്കുമരുന്നും വില്‍ക്കുന്നുണ്ടെന്ന് അറിഞ്ഞെത്തിയ ഉദ്യോഗസ്ഥരെയാണ് ആക്രമിച്ചത്.
🙏 പത്തനാപുരത്ത് പട്ടാപ്പകല്‍ നടുറോഡില്‍ ഭാര്യയെ കഴുത്തറുത്തു കൊല്ലാന്‍ ശ്രമിച്ച ഭര്‍ത്താവ് മലപ്പുറം സ്വദേശി ഗണേഷിനെ നാട്ടുകാര്‍ കെട്ടിയിട്ട് പൊലീസില്‍ ഏല്‍പ്പിച്ചു. 23 വയസുള്ള ഭാര്യ പത്തനാപുരം കടശ്ശേരി സ്വദേശി രേവതിയെ ഗുരുതരാവസ്ഥയില്‍ തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.
🙏മഹാരാജാസ് കോളജില്‍ അധ്യാപകനെ അപമാനിച്ച സംഭവത്തില്‍ കെഎസ് യുവിനു പങ്കില്ലെന്ന് സംസ്ഥാന പ്രസിഡന്റ് അലോഷ്യസ് സേവ്യര്‍. യുണിറ്റ് വൈസ് പ്രസിഡന്റ് മുഹമ്മദ് ഫാസിലിനെതിരെയുള്ള ആരോപണത്തിനും നടപടിക്കും പിന്നില്‍ ഇടതുപക്ഷ അധ്യാപക- അനധ്യാപക- വിദ്യാര്‍ത്ഥി സംഘടനകളുടെ ഗുഢലോചനയുണ്ട്.
🇳🇪 ദേശീയം 🇳🇪
🙏 ഭാരതം അതിവേഗം ഫൈവ് ജിയില്‍ നിന്ന് സിക്സ് ജിയിലേക്കു കുതിക്കുകയാണെന്ന് . ചെങ്കോട്ടയിലെ സ്വാതന്ത്ര്യദിന പ്രസംഗത്തില്‍ പ്രധാനമന്ത്രി നരേന്ദ്രമോദി പറഞ്ഞു.
🙏ബിഹാര്‍ മുഖ്യമന്ത്രി നിതീഷ്‌കുമാര്‍ പങ്കെടുത്ത സ്വാതന്ത്ര്യദിനാഘോഷ പരിപാടിയില്‍ സുരക്ഷാ വീഴ്ച. പാറ്റ്‌നയിലെ വേദിയിലേക്ക് ഇടിച്ചുകയറി സര്‍ക്കാര്‍ ജോലി ആവശ്യപ്പെട്ട നിതീഷ്‌കുമാര്‍ എന്ന യുവാവിനെ അറസ്റ്റു ചെയ്തു.
🙏മണിപ്പൂര്‍ കലാപത്തില്‍ വീടുകള്‍ നഷ്ടപ്പെട്ട മൂവായിരം കൂടുംബങ്ങള്‍ക്ക് സര്‍ക്കാര്‍ താത്കാലിക വീടുകള്‍ നിര്‍മിക്കുന്നു. ഒന്നാം ഘട്ട നിര്‍മാണം പൂര്‍ത്തിയായി. ദുരിതാശ്വാസ ക്യാമ്പുകളില്‍ താമസിക്കുന്ന അറുപതിനായിരത്തോളം പേരെ പുനരധിവസിപ്പിക്കാനാണ് ശ്രമം.
🙏ഇന്ത്യ- ചൈന അതിര്‍ത്തിയില്‍ സമാധാനം നിലനിര്‍ത്താന്‍ കമാന്‍ഡര്‍ തല ചര്‍ച്ചയില്‍ ധാരണയായി. എന്നാല്‍ സൈനിക പിന്‍മാറ്റം സംബന്ധിച്ച് തീരുമാനമില്ല.
🙏കോടതി വിധികള്‍ പ്രാദേശിക ഭാഷയിലും വേണമെന്ന സുപ്രീം കോടതി ഉത്തരവിനെ സ്വാഗതം ചെയ്ത് പ്രധാനമന്ത്രി നരേന്ദ്രമോദി. ചെങ്കോട്ടയില്‍ സ്വാതന്ത്ര്യദിന പരിപാടിയില്‍ പ്രസംഗിക്കവേയാണ് ഇക്കാര്യം പറഞ്ഞത്.
🙏കനേഡിയന്‍ പൗരനായിരുന്ന ബോളിവുഡ് സൂപ്പര്‍താരം അക്ഷയ് കുമാറിന് ഇന്ത്യന്‍ പൗരത്വം ലഭിച്ചു. അക്ഷയ് കുമാര്‍ തന്നെ വെളിപെടുത്തിയതാണ് ഇക്കാര്യം.
🙏ഹരിയാനയിലെ നൂഹിലുണ്ടായ കലാപവുമായി ബന്ധപ്പെട്ട് ഗോ സംരക്ഷകന്‍ ബിട്ടു ബജ്റംഗിയെ അറസ്റ്റു ചെയ്തു. കലാപത്തിനു പ്രേരിപ്പിക്കുകയും പ്രകോപനപരമായ ദൃശ്യങ്ങള്‍ പ്രചരിപ്പിക്കുകയും ചെയ്തതിനാണ് അറസ്റ്റ്.
🙏പൂനെയിലെ ഒരു ക്ലബിലെ ആഘോഷത്തിനിടെ ദേശീയ പതാകയെ അപമാനിച്ചെന്നാരോപിച്ച് പ്രശസ്ത യുക്രേനിയന്‍ ഗായിക ഉമാ ശാന്തിക്കെതിരെ കേസെടുത്തു.
🙏സുലഭ് ഇന്റര്‍നാഷണല്‍ സ്ഥാപകന്‍ ഡോ ബിന്ദേശ്വര്‍ പഥക് ഡല്‍ഹി എയിംസില്‍ അന്തരിച്ചു. ദേശീയ പതാക ഉയര്‍ത്തിയതിനു പിറകേ കുഴഞ്ഞു വീഴുകയായിരുന്നു. ശൗചാലയങ്ങളുടെ പ്രചരണത്തില്‍ വലിയ പങ്ക് വഹിച്ച സംഘടനയാണ് സുലഭ് ഇന്റര്‍നാഷണല്‍.
🙏നെഹ്‌റു മെമ്മോറിയല്‍ മ്യൂസിയം ആന്‍ഡ് ലൈബ്രറിയുടെ പേരുമാറ്റി. പ്രധാനമന്ത്രി മ്യൂസിയം ആന്‍ഡ് ലൈബ്രറി എന്നാണു മാറ്റിയത്. ആദ്യ പ്രധാനമന്ത്രിയുടെ ഔദ്യോഗിക വസതിയായിരുന്ന തീന്‍ മൂര്‍ത്തി ഭവന്‍ കഴിഞ്ഞ വര്‍ഷമാണ് മ്യൂസിയമാക്കി ഉദ്ഘാടനം ചെയ്ത്.
അന്തർദേശീയം
🙏20 കോടി ഡോളറിൻ്റെ (ഏകദേശം 1659 കോടി)
സഹായം കൂടി യുക്രെയ്ന് നൽകുമെന്ന് യു എസ് പ്രഖ്യാപിച്ചു.
🙏റഷ്യയിലെ റിപ്പബ്ലിക് ഓഫ് ഡെഗിസ്ഥാനിലെ പെട്രോള്‍ പമ്പിലുണ്ടായ സ്ഫോടനത്തില്‍ 35 പേര്‍ മരിച്ചു. 80 പേര്‍ക്കു പരിക്കേറ്റു.
🏑🏸കായികം 🥍 ⚽
⚽ വനിതാ ഫുട്ബോള്‍ ലോകകപ്പ് ഫൈനലില്‍ പ്രവേശിച്ച് സ്പെയ്ന്. ആവേശകരമായ സെമിയില്‍ ഒന്നിനെതിരേ രണ്ട് ഗോളുകള്‍ക്ക് സ്വീഡനെ തോല്‍പിച്ചാണ് സ്പെയ്ന് ഫൈനലില്‍ പ്രവേശിച്ചത്. ഇന്ന് നടക്കുന്ന ഓസ്ട്രേലിയ ഇംഗ്ലണ്ട് മത്സരത്തിലെ വിജയികളെ സ്പെയ്ന് ഫൈനലില്‍ നേരിടും.
⚽ മുൻ ഇന്ത്യന്‍ ഫുട്ബോള്‍ ടീം നായകന്‍ മുഹമ്മദ് ഹബീബ് അന്തരിച്ചു. 74 വയസായിരുന്നു. മറവിരോഗവും പാര്‍ക്കിന്‍സണ്‍സ് രോഗവും മൂലം ചികിത്സയിലായിരുന്നു.ഹൈദ്രാബാദിലായിരുന്നു അന്ത്യം. 1965 നും 1976 നും ഇടയില്‍ ഇന്ത്യന്‍ ടീമിലുണ്ടായിരുന്ന ഹബീബ് 1970ലെ ഏഷ്യന്‍ ഗെയിംസില്‍ വെങ്കലം നേടിയ ടീമിൽ അംഗമായിരുന്നു.
🤼♀️ പരിക്കേറ്റതുമൂലം ഇന്ത്യയുടെ മെഡല്‍ പ്രതീക്ഷയായ ഗുസ്തി താരം വിനേഷ് ഫോഗട്ട് ഏഷ്യന്‍ ഗെയിംസില്‍ നിന്ന് പിന്മാറി. പരിശീലനത്തിനിടെ പരിക്കേറ്റ വിനേഷ് ഫോഗട്ടിനെ മറ്റന്നാള്‍ മുംബൈയില്‍ ശസ്ത്രക്രിയ്ക്കു വിധേയയാക്കും.
🏏 ഒക്ടോബര്‍ അഞ്ചിനു തുടങ്ങുന്ന ഏകദിന ലോകകപ്പിനുള്ള, ടിക്കറ്റുകള്‍ക്കുള്ള രജിസ്ട്രേഷന്‍ തുടങ്ങി. ഐസിസി വെബ്സൈറ്റിലൂടെ സന്നാഹ മത്സരങ്ങള്‍ക്കും ലോകകപ്പ് മത്സരങ്ങള്‍ക്കുമുള്ള ടിക്കറ്റുകള്‍ക്കായി രജിസ്ട്രേഷന്‍ നടത്താം.
