തിരുവനന്തപുരം: സംസ്ഥാനത്ത് വിദേശ നിർമ്മിത വിദേശ മദ്യ വിൽപ്പന നിർത്തി വയ്ക്കാൻ ബെവ്കോ ജനറൽ മാനേജർ ഉത്തവിട്ട വാ‍ർത്ത ഇതിനകം ഏവരും അറിഞ്ഞിട്ടുണ്ടാകും. ഏന്നാൽ അതിൻറെ കാരണം പല‍ർക്കും അറിവുണ്ടാകില്ല.
വിദേശ നിർമ്മിത വിദേശ മദ്യത്തിൻറെ വില വർധനവുമായി ബന്ധപ്പെട്ടുള്ളതാണ് വിൽപ്പന നിർത്തി വയ്ക്കാനുള്ള ഉത്തരവ്. ഈ മാസം രണ്ട് മുതൽ വിദേശ നിർമ്മിത വിദേശ മദ്യത്തിൻറെ വിലയിൽ മാറ്റമുണ്ടായിരുന്നു. ഒൻപത് ശതമാനത്തിൻറെ വർധനവാണ് ഇക്കാര്യത്തിലുണ്ടായത്.
പുതിയ വില രേഖപ്പെടുത്തിയ ലേബൽ ഒട്ടിച്ചാകണം വിൽപ്പന നടത്തേണ്ടത്. എന്നാൽ ഇതിനകം പുതിയ വില രേഖപ്പെടുത്തിയ ലേബൽ ഒട്ടിക്കാൻ ബെവ്കോയ്ക്ക് സാധിച്ചിട്ടില്ല. ഇതുകൊണ്ടാണ് വിദേശ നിർമ്മിത വിദേശ മദ്യത്തിൻറെ വിൽപ്പന നിർത്തിവയ്ക്കാൻ ബെവ്കോ ജനറൽ മാനേജർ ഉത്തരവിട്ടത്. പുതിയ വില രേഖപ്പെടുത്തിയ ലേബൽ ഒട്ടിക്കുന്നതുവരെ നിലവിലുള്ള വിദേശ നിർമ്മിത വിദേശ മദ്യത്തിന്റെ സ്റ്റോക്ക് വിൽക്കേണ്ടെന്നും ബെവ്കോ ജനറൽ മാനേജർ പുറപ്പെടുവിച്ച ഉത്തരവിൽ വ്യക്തമാക്കിയിട്ടുണ്ട്.
സെപ്തംബർ 30 മുതൽ ഒക്ടോബർ അഞ്ച് വരെ വന്ന എല്ലാ സ്റ്റോക്കിലും പുതിയ വില രേഖപ്പെടുത്തണമെന്നാണ് നിർദ്ദേശത്തിൽ പറയുന്നത്. ഇത് പുർണമായും രേഖപ്പെടുത്തി കഴിഞ്ഞ ശേഷമേ വിദേശ നിർമ്മിത വിദേശ മദ്യത്തിൻറെ വിൽപ്പനയ്ക്ക് അനുമതി ഉണ്ടാകു.
