തിരുവനന്തപുരം : സംസ്ഥാന കോണ്‍ഗ്രസില്‍ കെ.സി. വേണുഗോപാല്‍ ഗ്രൂപ്പ് ചുവടുറപ്പിക്കുന്നു. എ ഗ്രൂപ്പിലെ വിമതരെ ഒപ്പം ചേര്‍ത്ത് യൂത്ത് കോണ്‍ഗ്രസ് സംഘടനാ തിരഞ്ഞെടുപ്പിലുണ്ടാക്കിയത് മികച്ച മുന്നേറ്റമായി. ലോക്‌സഭാ തിരഞ്ഞെടുപ്പ് കൂടി അടുത്തതോടെ കൂടുതല്‍ നേതാക്കള്‍ കെ.സി. പക്ഷത്തേക്ക് ചായാനുള്ള സാധ്യതയും ഏറിവരുന്നു.
എന്റെ പേരില്‍ ആരെങ്കിലും ഗ്രൂപ്പ് നടത്തുന്നുണ്ടെങ്കില്‍ അത് അവര്‍ അറിഞ്ഞുകൊളളും ”-യൂത്ത് കോണ്‍ഗ്രസ് തിരഞ്ഞെടുപ്പിന്റെ പശ്ചാത്തലത്തില്‍ ഇതായിരുന്നു കെസി വേണുഗോപാലിന്റെ പ്രഖ്യാപിത നിലപാട്. എന്നാല്‍ ഫലം വന്നപ്പോള്‍ ഏറ്റവും നേട്ടമുണ്ടാക്കിയത് കെ.സി ഗ്രൂപ്പ്. സംസ്ഥാന അധ്യക്ഷ സ്ഥാനത്തേക്ക് മത്സരിക്കാനില്ലെന്ന് വ്യക്തമാക്കി എ,ഐ ഗ്രൂപ്പുകള്‍ തമ്മിലുള്ള പോരാട്ടമാണെന്ന് ആദ്യം തോന്നിപ്പിച്ചു. ഇതിനിടയിലൂടെ സംസ്ഥാന ഭാരവാഹികളെയും ജില്ലാ അധ്യക്ഷന്മാരെയും നേടിയെടുത്തു. എ ഗ്രൂപ്പ് വിട്ട ടി.സിദ്ദീഖിനെ ഒപ്പം നിര്‍ത്തി കോഴിക്കോട് വിജയിച്ചു. എ ഗ്രൂപ്പുമായി അകന്ന വിഎസ് ജോയിയെ ചേര്‍ത്തുപിടിച്ച് മലപ്പുറവും ഒപ്പംകൂട്ടി. ഉമ്മന്‍ചാണ്ടിയുടെ തട്ടകമായിരുന്ന കോട്ടയത്തും എ ഗ്രൂപ്പിനെ പിളര്‍ത്തി. തിരുവഞ്ചൂരിനെ ഒപ്പം നിര്‍ത്തി വിജയം കണ്ടു. പത്തനംതിട്ടയിലും എ ഗ്രൂപ്പിലെ തര്‍ക്കങ്ങളെ മുതലെടുത്തു.
വരും ദിനങ്ങളിൽ കൂടുതൽ കരുത്തരെ കൂടെ നിർത്തി സംസ്ഥാന രാഷ്ട്രീയത്തിൽ കരുത്ത് കാട്ടാനാണ് നീക്കം.
