താമരശ്ശേരി. വിധിവീണ്ടും ആഞ്ഞുകൊത്തുമെന്ന് സാറ തോമസിന്റെ കുടുംബം കരുതിയില്ല.സാറയുടെ പിതാവ് തോമസ് പാമ്പു കടിയേറ്റ് ദീർഘ നാളായി ചികിത്സയിൽ ആയിരുന്നു. പിതാവ് ആരോഗ്യം വീണ്ടെടുത്ത് വരുന്നതിനിടെയാണ് സാറയുടെ മരണം. സ്വന്തം വീടില്ലാത്ത കുടുംബം ബന്ധുവിന്റെ വീട്ടിലാണ് താമസിക്കുന്നത്. ദുരന്തം വിശ്വസിക്കാനാകുന്നില്ല കോഴിക്കോട് – താമരശ്ശേരിയിലെ കുടുംബത്തിനും നാട്ടുകാർക്കും. പഠനത്തിനൊപ്പം കലാ -കായിക മേഖലയിലും മികച്ച പ്രകടനം കാഴ്ചവച്ച വിദ്യാർത്ഥിനിയായിരുന്നു സാറ.
കുസാറ്റിലുണ്ടായ അപകടത്തിൽ പൊലിഞ്ഞവരിൽ താമരശ്ശേരി കോരങ്ങാട് സ്വദേശികളായ തോമസ് -കൊച്ചുറാണി ദമ്പതികളുടെ മകൾ ഉണ്ടെന്ന് വാർത്തയിലൂടെയാണ് ബന്ധുക്കളും നാട്ടുകാരും അറിഞ്ഞത്. അത് ശരിയാവരുതെന്ന് പ്രാർത്ഥിച്ചെങ്കിലും ഫലമുണ്ടായില്ല. തോമസ് -കൊച്ചുറാണി ദമ്പതികളുടെ മൂന്ന് പെൺ മക്കളിൽ നടുവിലെ കുട്ടിയാണ് സാറ . നല്ലപ്രതീക്ഷയായിരുന്നു സാറയില്‍ വീട്ടുകാര്‍ക്ക്. ഏറെ പരുക്കുകളോടെ മുഖം തിരിച്ചറിയാത്തവിധമായിരുന്നു സാറയുടെ മൃതദേഹം.
ഓമനയായ ചെറുമകളുടെ മരണ വിവരം അറിയാതെ കാത്തിരിക്കുകയാണ് 95 കാരിയായ മുത്തശ്ശി. നാളെ രാവിലെ ഒമ്പതിന് താമരശ്ശേരി-ഈങ്ങാപ്പുഴ ഓർത്തഡോക്സ് വലിയ പള്ളിയിലാണ് സാറയുടെ സംസ്കാരം.
