പാലക്കാട്: ഒലവക്കോട് താണാവില്‍ വനിതയ്ക്ക് നേരെ മുന്‍ ഭര്‍ത്താവിന്റെ ആസിഡ് ആക്രമണം. താണാവില്‍ ലോട്ടറി കട നടത്തുന്ന ഒലവക്കോട് സ്വദേശിനി ബര്‍ക്കിനയ്ക്ക് നേരേയാണ് ആസിഡ് ആക്രമണമുണ്ടായത്.
ഇന്ന് രാവിലെ ഏഴ് മണിയോടെയായിരുന്നു ആക്രമണം.
ബര്‍ക്കിനയുടെ മുന്‍ ഭര്‍ത്താവ് തമിഴ്നാട് സ്വദേശി കാജാ ഹുസൈനാണ് ആക്രമണം നടത്തിയത്. സാരമായി പൊള്ളലേറ്റ ബര്‍ക്കിന പാലക്കാട് ജില്ലാ ആശുപത്രിയില്‍ ചികിത്സയിലാണ്. കാജാ ഹുസൈനെ പാലക്കാട് നോര്‍ത്ത് പൊലീസ് കസ്റ്റഡിയിലെടുത്തു
രാവിലെ ഇവിടെയെത്തി ഹുസൈന്‍ ഭാര്യയുമായി സംസാരിക്കുകയും തര്‍ക്കത്തെ തുടര്‍ന്ന് കയ്യിലുള്ള കുപ്പിയിലെ ദ്രാവകം മുഖത്തേക്ക് ഒഴിക്കുകയുമായിരുന്നു. ബര്‍ക്കിനയുടെ മുഖത്ത് പൊള്ളലേറ്റു. തുടര്‍ന്ന് കാജാ ഹുസൈന്‍ ഓടിരക്ഷപ്പെടാന്‍ നോക്കി
അതേസമയം സംഭവം കണ്ട് ഓടിക്കൂടിയ ആള്‍ക്കാര്‍ ഹുസൈനെ പിടികൂടി പോലീസില്‍ ഏല്‍പ്പിക്കുകയായിരുന്നു. ഇരുവരും ഏറെക്കാലമായി പിരിഞ്ഞു താമസിക്കുകയായിരുന്നു. ഇതിന്റെ തുടര്‍ച്ചയാണ് ആക്രമണമെന്നാണ് പോലീസ് സംശയിക്കുന്നത്. ഇയാളെ ഉടന്‍ ചോദ്യം ചെയ്യും.
