കോഴിക്കോട് . പൂളങ്കരയിൽ കാർമോഷണക്കേസിലെ പ്രതിയെ കസ്റ്റഡിയിലെടുക്കാൻ എത്തിയ പൊലീസുകാർക്ക് നേരെ നാട്ടുകാരുടെ അക്രമം.
പ്രതിയെ വാഹനത്തിൽ കയറ്റുന്നതിനിടെ നാട്ടുകാർ പൊലീസ് വാഹനത്തിന്റെ ചില്ല് തകർത്തു. സംഘർത്തിനിടെ പ്രതി രക്ഷപ്പെട്ടു.
പന്തീരങ്കാവ് പൂളങ്കരയിൽ വ്യാഴാഴ്ച രാത്രിയാണ് സംഘർഷമുണ്ടായത്. എറണാകുളം ഞാറയ്ക്കൽ പൊലീസ് രജിസ്റ്റർ ചെയ്ത കേസിലെ പ്രതി ഷിഹാബ് സഹീറിനെ കസ്റ്റഡിയിലെടുക്കാനെത്തിയതായിരുന്നു അന്വേഷണ സംഘം. പ്രതിയെ വാഹനത്തിലേക്ക് കയറ്റുന്നതിനിടെ നാട്ടുകാർ തടഞ്ഞു. തുടർന്ന് നാട്ടുകാരും പൊലീസും തമ്മിൽ വാക്കേറ്റമുണ്ടാകുകയും സംഘർഷത്തിലേക്ക് നീങ്ങുകയും ചെയ്തു. പൊലീസ് വന്ന വാഹനത്തിന്റെ ചില്ല് തകർത്തു. ഒടുവിൽ പന്തീരങ്കാവ് പൊലീസ് എത്തി ലാത്തിച്ചാർജ് നടത്തിയാണ്
നാട്ടുകാരെ പിരിച്ചു വിട്ടത്. ബഹളത്തിനിടെ പ്രതി ഓടി രക്ഷപ്പെട്ടു. കൃത്യ നിർവ്വഹണം തടസ്സപ്പെടുത്തൽ, ബലംപ്രയോഗിച്ച് പ്രതിയെ മോചിപ്പിക്കൽ തുടങ്ങിയ വകുപ്പുകൾ ചുമത്തി കണ്ടാലറിയാവുന്ന 100ലേറെ പേർക്കെതിരെ പന്തീരങ്കാവ് പൊലീസ് കേസ്സെടുത്തിട്ടുണ്ട്. രക്ഷപ്പെട്ട പ്രതിക്കും, സംഘർഷമുണ്ടാക്കിയർവക്കും വേണ്ടി പൊലീസ് അന്വേഷണം ഊർജ്ജിതമാക്കി.
