കോഴിക്കോട് പയ്യോളി ടൗണിന് സമീപം ഇരുപത്തിരണ്ടുകാരിയായ യുവതിക്കുനേരേ ലൈംഗികാതിക്രമം നടത്തിയ യുവാവ് പിടിയില്‍.
പള്ളിക്കര പോറോത്ത് സൗപര്‍ണികയില്‍ എ.എസ്. ഹരിഹരനെയാണ് (20) പയ്യോളി പോലീസ് അറസ്റ്റുചെയ്തത്. ബിരുദവിദ്യാര്‍ഥിയും കെ.എസ്.യു. പ്രവര്‍ത്തകനുമാണ്. മേയ് 29-ന് വൈകീട്ടാണ് സംഭവം.
റോഡില്‍വെച്ച് ശല്യംചെയ്തപ്പോള്‍ കുടകൊണ്ട് യുവതി തട്ടിമാറ്റി. തുടര്‍ന്ന് സമീപത്തെ കെട്ടിടത്തിലേക്ക് യുവതി ഓടിക്കയറിയപ്പോള്‍ കോണിപ്പടി കയറിവന്ന യുവാവ് ലൈംഗികാതിക്രമം നടത്തുകയായിരുന്നു. യുവതിയുടെ പരാതിപ്രകാരം സി.സി.ടി.വി.യില്‍നിന്ന് യുവാവിന്റെ ദൃശ്യം കിട്ടിയ പോലീസ് അന്വേഷിച്ചുവരുകയായിരുന്നു. കഴിഞ്ഞദിവസം പെരുമാള്‍പുരത്തെ വെള്ളക്കെട്ടില്‍ ടിപ്പര്‍ലോറി കുടുങ്ങിയതിനെത്തുടര്‍ന്ന് ഗതാഗതസ്തംഭനമുണ്ടായിരുന്നു. സ്ഥലത്തെത്തിയ എസ്.ഐ. എ. അന്‍വര്‍ഷായ്ക്ക് ടിപ്പര്‍ ഓടിച്ച യുവാവിനെ കണ്ടപ്പോള്‍ ദൃശ്യത്തിലെ യുവാവുമായി സാദൃശ്യംതോന്നി. യുവാവ് ധരിച്ച ചെരിപ്പ് സി.സി.ടി.വി.യില്‍ കണ്ട യുവാവിന്റെ ചെരിപ്പുമായി സാമ്യമുള്ളതാണെന്നും ബോധ്യമായതോടെ ഹരിഹരനെ കസ്റ്റഡിയിലെടുക്കുകയായിരുന്നു.
