തൃശൂർ. വിജയാഹ്ളാദ വരവിൽ തൃശൂരിനെ പൂരാരവത്തിലാക്കി സുരേഷ് ഗോപി.
പതിനായിരങ്ങളെ പങ്കെടുപ്പിച്ചുള്ള പടുകൂറ്റൻ റോഡ് ഷോ നാടിനെ ഇളക്കി മറിച്ചു.
തൃശൂർ കളക്ട്രെറ്റിൽ നിന്ന് വിജയപത്രം ഏറ്റുവാങ്ങി സുരേഷ് ഗോപി നേരെ എത്തിയത് നഗരഹൃദയത്തിലേക്ക്.
കാത്തു നിന്ന പതിനായിരങ്ങളിലേക്ക് ആവേശത്തിന്റെ തീക്കാറ്റ് പടർന്നത് അതിവേഗമാണ്. എന്റെ തിടമ്പും നെറ്റിപ്പട്ടവും കിരീടവും ഇനി തൃശൂർ ആണെന്ന് വൈകാരിക പ്രതികരണം
ജനങ്ങളെ അഭിവാദ്യം ചെയ്ത് തുറന്ന വാഹനത്തിൽ തൃശൂർ റൗണ്ടിലൂടെ യാത്ര. സുരേഷ് ഗോപിയുടെ ചലച്ചിത്ര ഗാനങ്ങൾക്ക് ചുവട് വെച്ച് ബിജെപി പ്രവർത്തകർ. അക്ഷരാർത്ഥത്തിൽ തൃശൂർ പൂരാമോദത്തിലായി. തെങ്കാശിപ്പട്ടണത്തിലെ കെഡി ആന്റ് കമ്പനി പാട്ട് അടക്കം ഗുണ്ടുപോലെ വീണുപൊട്ടി. അതു നമുക്കിട്ടാണല്ലോ മച്ചമ്പീ എന്ന് പറഞ്ഞ് മാറിയവരും ആഘോഷത്തില്‍ പങ്കെടുത്തു.
കെ സുരേന്ദ്രൻ അടക്കം സംസ്ഥാന നേതാക്കളും ആഹ്ലാദപ്രകടനത്തിൽ പങ്കാളികളായി. കേന്ദ്ര മന്ത്രി സ്ഥാനവുമായി ബന്ധപ്പെട്ട ചർച്ചകൾക്കായി സുരേഷ് ഗോപി നാളെ പ്രധാനമന്ത്രിയുമായി കൂടിക്കാഴ്ച നടമെന്നാണ് സൂചന.
