ന്യൂഡെല്‍ഹി.സിപിഐഎം ന്റെ നിർണ്ണായക കേന്ദ്ര കമ്മറ്റി യോഗം ഇന്ന് ഡൽഹിയിൽ ആരംഭിക്കും.ലോക്സഭാ തിരഞ്ഞെടുപ്പ് അവലോകനമാണ് മൂന്ന് ദിവസത്തെ യോഗത്തിന്റെ പ്രധാന അജണ്ട. കഴിഞ്ഞ പോളിറ്റ് ബ്യുറോ യോഗം പ്രാഥമിക അവലോകനത്തിന് ശേഷം, കേരളത്തിലെ തെരഞ്ഞെടുപ്പ് പ്രകടനം നിരാശജനകമെന്ന് വിലയിരുത്തിയിരുന്നു. കേരളത്തിൽ ഉണ്ടായ തിരിച്ചടികൾ സംബന്ധിച്ച് വിശദമായ അവലോകനം കേന്ദ്ര കമ്മിറ്റി യോഗത്തിൽ ഉണ്ടാകും.
കീഴ്ഘടകങ്ങളിൽ നടന്ന ചർച്ചകളിൽ മുഖ്യമന്ത്രിക്കും സർക്കാറിനും എതിരെ കടുത്ത വിമർശനങ്ങൾ ഉയർന്നിരുന്നു. കേന്ദ്ര കമ്മിറ്റി യോഗത്തിൽ നടക്കുന്ന ചർച്ചകളിലും ഉയരാൻ സാധ്യതയുണ്ട് എന്നാണ് നേതാക്കളിൽ നിന്നും ലഭിക്കുന്ന സൂചന. ബംഗാൾ അടക്കമുള്ള മറ്റു സംസ്ഥാനങ്ങളിൽ നിന്നുള്ള അംഗങ്ങളുടെ നിലപാടുംനിർണായകമാകും.പാർട്ടി ഭരണ ത്തിലുള്ള ഏക സംസ്ഥാനമെന്ന നിലയിൽ,കേരളത്തിലെ തിരിച്ചടി വിശദമായ അവലോകനം ചെയ്യുമെന്നും,തെറ്റുകൾ കണ്ടെത്തിയാൽ തിരുത്തൽ നടപടികൾ ഉണ്ടാകുമെന്നു കേന്ദ്ര നേതാക്കൾ അറിയിച്ചു. രാവിലെ നടക്കുന്ന റിപ്പോർട്ടിങ്ങിന് ശേഷം ഉച്ചയ്ക്കുശേഷം ആകും ചർച്ചകൾ ആരംഭിക്കുക. ശനിയാഴ്ച പോളിറ്റ് ബ്യുറോ യോഗം ചേർന്ന് ചർച്ചകൾക്ക് മറുപടി തയ്യാറാക്കും.
