കണ്ണൂർ:പാര്‍ട്ടിയെ ആട്ടി ഉലച്ച വെളിപ്പെടുത്തലിന് പിന്നാല ഇന്ന് ചേർന്ന സിപിഐഎം കണ്ണൂർ ജില്ലാ സെക്രട്ടറിയേറ്റ് യോഗം പാർട്ടിക്കെതിരായ ആരോപണങ്ങൾ തള്ളി. മാധ്യമങ്ങൾ വ്യാജവാർത്ത പ്രചരിപ്പിക്കുകയാണെന്ന് പാർട്ടി കുറ്റപ്പെടുത്തി. പി ജയരാജനും, എം ഷാജറിനുമെതിരെ അപവാദ പ്രചരണങ്ങൾ നടക്കുകയാണെന്ന് യോഗം വിലയിരുത്തി.ക്വട്ടേഷൻ കാരായ ചിലർ നടത്തുന്ന പ്രചരണങ്ങൾ പ്രതിഷേധാർഹമാണെന്നും, ക്വട്ടേഷൻ സംഘങ്ങളെ സഹായിക്കുകയോ സംരക്ഷിക്കുകയാ ചെയ്യുന്ന പാർട്ടിയല്ല സി പി ഐ എം എന്നും പറഞ്ഞു.പാർട്ടി വക്താവാകാൻ ആരേയും ചുമതലപ്പെടുത്തിയിട്ടില്ലന്ന് ആകാശ് തില്ലങ്കേരിയുടെ ഫെയ്സ് ബുക്ക് പരാമർശത്തെ കുറിച്ചുള്ള പ്രതികരണത്തിൽ പാർട്ടി പറഞ്ഞു. മാധ്യമങ്ങൾ വ്യാജവാർത്തകൾ പ്രചരിപ്പിക്കുകയാണ് .
പാർട്ടി വിട്ട യുവനേതാവ് മനു തോമസിന്റെ വെളിപ്പെടുത്തൽ വിവാദങ്ങൾക്കിടെയായിരുന്നു യോഗം. സംസ്ഥാന സമിതിയംഗം പി ജയരാജനും യോഗത്തിൽ പങ്കെടുത്തു. പി ജയരാജനെതിരെ മനു തോമസ് കടുത്ത വിമർശനം ഉന്നയിച്ചെങ്കിലും സിപിഐഎം നേതൃത്വം ഇതുവരെ പ്രതികരിക്കാൻ തയ്യാറായിട്ടില്ലായിരുന്നു. വിവാദം സെക്രട്ടറിയേറ്റ് ചർച്ച ചെയ്യും.
