കണ്ണൂർ, ഏച്ചൂർ കമാൽപീടികയിൽ പോലീസുകാരൻ ഓടിച്ച കാറിടിച്ച് കാൽനട യാത്രക്കാരിക്ക് ദാരുണാന്ത്യം. ഏച്ചൂർ, തക്കാളിപ്പീടിക സ്വദേശിനി ബീനയാണ് മരിച്ചത്. കണ്ണൂർ ടൗൺ പോലീസ് സ്റ്റേഷനിലെ സിപിഒ ലിതേഷാണ് അപകടമുണ്ടാക്കിയ കാർ ഓടിച്ചത്.
അമിതവേഗത്തിൽ എത്തിയ കാർ വഴിയാത്രക്കാരിയെ ഇടിച്ചുതറിപ്പിക്കുന്ന ദൃശ്യം പുറത്തുവന്നു.
മുണ്ടേരി വനിതാ സഹകരണ സംഘത്തിലെ ബിൽ കലക്ടറായിരുന്നു അപകടത്തിൽ മരിച്ച ബീന. വഴിയരികിലൂടെ നടന്നു പോവുകയായിരുന്ന ബീനയെ പിന്നിൽ നിന്ന് അമിതവേഗത്തിൽ എത്തിയ കാർ ഇടിച്ചുതെറിപ്പിച്ചു. ഇടിയുടെ ആഘാതത്തിൽ സമീപത്തെ കടയുടെ മുറ്റത്തേക്ക് തെറിച്ചു വീണ ബീനയെ നാട്ടുകാർ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അപകടമുണ്ടാക്കിയ ശേഷം നിർത്താതെ പോയ കാർ നാട്ടുകാർ തടഞ്ഞുവെച്ചു. പിന്നീട് പോലീസിൽ അറിയിക്കുകയായിരുന്നു. കാർ ഓടിച്ചിരുന്ന കണ്ണൂർ ടൗൺ സ്റ്റേഷനിലെ സിപിഒ ലിതേഷിനെ ചക്കരക്കൽ പോലീസ് കസ്റ്റഡിയിലെടുത്തു. ഇയാളെ വൈദ്യ പരിശോധനയ്ക്ക് വിധേയനാക്കിയ ശേഷം അറസ്റ്റ് രേഖപ്പെടുത്തും
