ആലപ്പുഴ. കുപ്രസിദ്ധ അന്താരാഷ്ട്ര മോഷ്ടാവ് ബണ്ടി ചോർ അമ്പലപ്പുഴയിലെത്തിയതായി സംശയം. അമ്പലപ്പുഴ നീർക്കുന്നത്ത് ദേശീയ പാതയോരത്ത് പ്രവർത്തിക്കുന്ന ബാറിൽ കഴിഞ്ഞ രാത്രിയിൽ ബണ്ടി ചോർ എത്തിയതിൻ്റെ ദൃശ്യങ്ങൾ സി.സി.ടി.വിയിൽ പതിഞ്ഞിരുന്നു. അമ്പലപ്പുഴ പൊലീസ് അന്വേഷണം ആരംഭിച്ചു
നീർക്കുന്നത്തെ ഒരു ബാറിലിരുന്നു മദ്യപിക്കുന്ന ഒരാൾക്ക് ബണ്ടി ചോറിന്റെ രൂപസാദൃശ്യം തോന്നിയതോടെയാണ് ബാറിലെ ജീവനക്കാർ പോലീസിൽ വിവരമറിയിച്ചത്.
വിവരമറിയിച്ചതിനെത്തുടർന്ന് അമ്പലപ്പുഴ പോലീസ് ഇവിടെയെത്തി പരിശോധന നടത്തിയെങ്കിലും ആളെ കണ്ടെത്താനായില്ല. ടീ ഷർട്ട് ധരിച്ച് ബാഗുമായി എത്തിയ ഇയാൾ ബാറിൽ ഉണ്ടായിരുന്നവരുമായി സംസാരിച്ചുവെന്നും പോലീസ് സ്ഥിരീകരിക്കുന്നു. ഇന്നലെ രാത്രിയിലും ഇന്ന് രാവിലെയും അമ്പലപ്പുഴയിലും ആലപ്പുഴയിലും ഉള്ള ഹോട്ടലുകളിലും ലോഡ്ജുകളിലും പോലീസ് പരിശോധന നടത്തി. രാജ്യത്താകമാനം മോഷണ പരമ്പരകൾ നടത്തിയ ചോറിനെതിരെ 500 ൽ അധികം കേസുകളാണ് നിലവിലുള്ളത്. തിരുവനന്തപുരം മോഷണം നടത്തിയ കേസിൽ കേരള പോലീസ് ബണ്ടി ചൊറിനെ പൂനെയിൽ നിന്നാണ് അറസ്റ്റ് ചെയ്യുകയും കേരളത്തിൽ ജയിൽവാസം അനുഭവിക്കുകയും ചെയ്തിരുന്നു. നിലവിൽ മാനസികാരോഗ്യ കേന്ദ്രത്തിൽ കഴിഞ്ഞിരുന്ന ഇയാള്‍ അടുത്തിടെ പുറത്തിറങ്ങിയതാണ് പോലീസിന് ലഭിക്കുന്ന വിവരം. ജില്ലയിലെ എല്ലാ പോലീസ് സ്റ്റേഷനുകളിലും ജാഗ്രത പാലിക്കാൻ ജില്ലാ പോലീസ് മേധാവി നിർദേശം നൽകിയിട്ടുണ്ട്.
