തിരുവനന്തപുരം.കേന്ദ്ര ബഡ്ജറ്റിൽ നിന്നും ചെറുകിട വ്യാപാര മേഖലയ്ക്ക് പ്രത്യക്ഷ നേട്ടം ഒന്നും ഇല്ല എന്ന് കേരള വ്യാപാരി വ്യവസായി ഏകോപന സമിതി സംസ്ഥാന പ്രസിഡണ്ടും കോൺഫഡറേഷൻ ഓഫ് ആൾ ഇന്ത്യ ട്രേഡേഴ്സ് (CAIT) ദേശീയ സെക്രട്ടറിയുമായ എസ്. എസ്. മനോജ് പറഞ്ഞു.
മുദ്രാവായ്പ 10 ലക്ഷത്തിൽ നിന്നും 20 ലക്ഷം രൂപയായി ഉയർത്തി എന്നത് മാത്രമാണ് എടുത്തു പറയാനുള്ളത്.
ഇതര മേഖലകൾക്ക് നൽകിയ ബജറ്റ് വിഹിതം മൂലം ക്രയവിക്രയ സാധ്യത വർദ്ധിച്ചു എങ്കിലും, അത് റീട്ടെയിൽ വ്യാപാര മേഖലയിലെ വിപണിയിൽ കൂടി പ്രതിഫലിക്കുന്നതിന് ആവശ്യമായ നടപടികൾ ഒന്നും തന്നെയില്ല.
ജി. എസ്. റ്റിയിൽ ഗണ്യമായ വർധനവ് ഉണ്ടായി എന്ന് പ്രഖ്യാപിച്ചപ്പോഴും, അതിന് പ്രധാന പങ്ക് വഹിച്ച റീട്ടെയിൽ വ്യാപാര മേഖലയ്ക്ക് ആശ്വാസം നൽകിയില്ല എന്ന് മാത്രമല്ല ഒരു നന്ദി പോലും പറയുവാൻ ധനമന്ത്രി തയ്യാറായില്ലാ എന്നും അദ്ദേഹം പറഞ്ഞു.
കാർഷിക മേഖല കഴിഞ്ഞാൽ ഏറ്റവും കൂടുതൽ ജനവിഭാഗം പ്രത്യക്ഷമായും പരോക്ഷമായും ആശ്രയിക്കുന്ന തൊഴിൽ മേഖലയാണ് റീട്ടെയിൽ വ്യാപാര മേഖലയെങ്കിലും കാലാകാലങ്ങളായി ഈ മേഖലയിൽ അടിഞ്ഞു കൂടിയ ബജറ്റ് അവഗണന ഇപ്പോഴും തുടരുന്നു എന്നും അദ്ദേഹം പറഞ്ഞു.
