തിരുവനന്തപുരം.എം.മുകേഷ് എം.എല്‍.എ സ്ഥാനം രാജിവയ്‌ക്കേണ്ടതില്ലെന്ന് സി.പി.ഐ.എം. ഇന്നു ചേര്‍ന്ന അവയ്‌ലബിള്‍ സെക്രട്ടേറിയറ്റിന്റേതാണ് തീരുമാനം. നാളെ ചേരുന്ന സംസ്ഥാന സെക്രട്ടേറിയറ്റ് യോഗം ഈ വിഷയം വീണ്ടും ചര്‍ച്ച ചെയ്യും.
ലൈംഗിക അതിക്രമ പരാതിയില്‍ പോലീസ് കേസ് രജിസ്റ്റര്‍ ചെയ്ത മുകേഷ് എംഎല്‍.എ സ്ഥാനം രാജിവയ്ക്കണമെന്ന് ആവശ്യം ഉയര്‍ന്നിരുന്നു. ഈ സാഹചര്യത്തിലാണ് അവയ്‌ലബിള്‍ സെക്രട്ടേറിയറ്റ് യോഗം ചേര്‍ന്നത്. എന്നാല്‍ എം.എല്‍.എ സ്ഥാനം രാജിവയ്ക്കാന്‍ ആവശ്യപ്പെടേണ്ടെന്നാണ് അവയ്‌ലബിള്‍ സെക്രട്ടേറിയറ്റ് ധാരണയിലെത്തിയത്. മുകേഷിനെതിരെ ആരോപണം ഉയര്‍ന്നപ്പോള്‍ സര്‍ക്കാര്‍ ഒരു സംരക്ഷണവും നല്‍കാതെ തുടര്‍ നടപടി സ്വീകരിച്ചു. മുകേഷിനെ സംരക്ഷിക്കാന്‍ സര്‍ക്കാര്‍ ശ്രമിച്ചില്ല. എന്നാല്‍ ആരോപണത്തിന്‍െ്‌റ സത്യാവസ്ഥ തെളിയുന്നതിന് മുമ്പ് എം.എല്‍.എ സ്ഥാനം രാജിവയ്ക്കാന്‍ ആവശ്യപ്പെടുന്നത് രാഷ്ട്രീയ പ്രേരിതമാണ്.
കോണ്‍ഗ്രസും ബി.ജെ.പിയും ഉന്നയിക്കുന്ന ഈ ആവശ്യത്തിന് വഴങ്ങേണ്ടതില്ല. എന്നാല്‍ സിനിമാ നയരൂപീകരണ സമിതിയില്‍ നിന്നും മുകേഷിനെ ഒഴിവാക്കും. ഇതിനായി സമിതി പുനസംഘടിപ്പിക്കണം. രാജിവയ്ക്കണമെന്ന സി.പി.ശഎ ദേശീയ നേതൃത്വത്തിന്റെ ആവശ്യം അവയ്‌ലബിള്‍ സെക്രട്ടേറിയറ്റ് യോഗം കണക്കിലെടുത്തില്ല. നാളെ ചേരുന്ന സി.പി.ഐ.എം സംസ്ഥാന സെക്രട്ടേറിയറ്റ് യോഗം മുകേഷിന്റെ രാജി ആവശ്യം വീണ്ടും ചര്‍ച്ച ചെയ്യും. ഇതിലാകും അന്തിമ തീരുമാനമെടുക്കുക.
