മലപ്പുറം. എടപ്പാളിൽ അനുവദിച്ച സമയം കഴിഞ്ഞും ബെവ്‌കോ ഔട്ലെറ്റിൽ നിന്ന് മദ്യം വാങ്ങിയ പോലീസുകാരുടെ ദൃശ്യങ്ങൾ പകർത്തിയ നാട്ടുകാരന് മർദ്ദനം. ചങ്ങരംകുളം സ്റ്റേഷനിലെ ഉദ്യോഗസ്ഥർ ആണെന്ന് പറഞ്ഞു കൊണ്ടായിരുന്നു അതിക്രമം. പരിക്കേറ്റ യുവാവ് എടപ്പാളിലെ സ്വകാര്യ ആശുപത്രിയിൽ ചികിത്സയിലാണ്. എടപ്പാൾ കണ്ടനകം ബീവറേജിൽ ഇന്നലെ രാത്രി 9.30യോട് കൂടിയാണ് സംഭവം. ബീവറേജ് ഔട്ട്ലെറ്റിലെ ഗേറ്റിനു പുറമേ നിന്ന് രണ്ടുപേർ ബീവറേജ് ജീവനക്കാരുമായി സംസാരിക്കുന്നതും പണം കൈമാറുന്നതും ശ്രദ്ധയിൽപ്പെട്ട യുവാവ് ഇത് മൊബൈൽ പകർത്തുകയായിരുന്നു. ഇത് ശ്രദ്ധയിൽപെട്ടതോടെ ഇവർ ഫോൺ പിടിച്ചു വാങ്ങുകയും യുവാവിനെ മർദ്ദിക്കുകയും ചെയ്തു എന്നാണ് പരാതി.കണ്ടനകം സ്വദേശി സുനീഷ് കുമാറിനാണ് പരിക്കേറ്റത്. ബിവറേജിൽ ജോലി ചെയ്യുന്ന സുഹൃത്തിനെ കാണാനാണ് എത്തിയത് എന്നും സുനീഷ്‌കുമാർ ആണ് ആദ്യം മർദിച്ചത് എന്നും പൊലീസുകാർ പറഞ്ഞു
