മലപ്പുറം.സിപിഎം പ്രത്യാക്രമണം തുടരുന്നതിനിടെ മലപ്പുറം ജില്ലാ സെക്രട്ടറിക്കെതിരെ ഗുരുതര ആരോപണങ്ങളുമായി പി.വി അൻവർ എംഎൽഎ. ജില്ലാ സെക്രട്ടറി ഇ എൻ മോഹൻദാസിന് ആർഎസ്എസ് മനസ്സാണ്. ന്യൂനപക്ഷങ്ങളെ കള്ളക്കേസിൽ കുടുക്കാൻ കൂട്ടുനിന്നു. നാളത്തെ പൊതുസമ്മേളനത്തിൽ തെളിവുകൾ പുറത്തുവിടുമെന്നും അൻവർ പറഞ്ഞു. അതേ സമയം അൻവറിനെതിരായ സിപിഎം പ്രകടനത്തിലെ ഭീഷണി മുദ്രാവാക്യത്തെ സിപിഐ തള്ളി.
പി വി അൻവർമായുള്ള ബന്ധം പാർട്ടി ഉപേക്ഷിച്ചതോടെ മലപ്പുറം ജില്ലാ സെക്രട്ടറി ഇ എൻ മോഹൻദാസ് രൂക്ഷ പ്രതികരണം അൻവർ നെതിരെ നടത്തിയിരുന്നു. ഇതാണ് അൻവറിനെ ചൊടിപ്പിച്ചത്. മോഹൻദാസിന് മുസ്ലിം വിരോധമാണ്. ആർഎസ്എസിന് വേണ്ടി രാപ്പകൽ പണിയെടുക്കുകയാണ്. ആർഎസ്എസ് ബന്ധം കാരണം ഒരു ജില്ലാ സെക്രട്ടറിയേറ്റ് അംഗം സെക്രട്ടറിയെ മർദ്ദിക്കാൻ വരെ തുനിഞ്ഞു. 2021ൽ തന്നെ നിലമ്പൂരിൽ തോൽപ്പിക്കാൻ ശ്രമിച്ചു. തെളിവുകളടക്കം മോഹൻദാസിനെതിരെ നാളെ പൊതുസമ്മേളനത്തിൽ തുറന്നു പറയുമെന്നും അൻവർ ആഞ്ഞടിച്ചു.
ഇന്നലെ അൻവറിനെതിരെ നിലമ്പൂരിൽ നടന്ന സിപിഎം പ്രതിഷേധ പ്രകടനത്തിൽ കൊലവിളി മുദ്രാവാക്യം ഉയർന്നിരുന്നു. ഇതു തള്ളി സിപിഐ രംഗത്തെത്തി. കയ്യും കാലും വെട്ടുന്നത് കമ്മ്യൂണിസ്റ്റ് ശൈലിയല്ലെന്നും ആശയങ്ങളെ എതിർക്കേണ്ടത് ആശയങ്ങൾ കൊണ്ടാകണമെന്നും സിപിഐ സംസ്ഥാന സെക്രട്ടറി ബിനോയ് വിശ്വം പറഞ്ഞു.
പിവി അൻവറിനെ അനുകൂലിച്ച് നിലമ്പൂർ ജില്ലാ ആശുപത്രിക്ക് സമീപം ഫ്ലക്സുകൾ ഉയർന്നു. ഒരു പറ്റം ആംബുലൻസ് ഡ്രൈവർമാരും ഓട്ടോറിക്ഷ ഡ്രൈവർമാരുമാണ് ഐക്യദാർഢ്യം പ്രഖ്യാപിച്ചത്.
