കണ്ണൂരിൽ രണ്ട് സിപിഐഎം ബ്രാഞ്ച് സെക്രട്ടറിമാർക്കെതിരെ പോക്സോ കേസ്. സ്കൂൾ വിദ്യാർത്ഥികളായ ആൺകുട്ടികളെ ലൈംഗികമായി പീഡിപ്പിച്ചതിലാണ് കേസ്. തളിപ്പറമ്പ് മുയ്യം പടിഞ്ഞാറ് ബ്രാഞ്ച് സെക്രട്ടറി രമേശൻ, മുയ്യം ബ്രാഞ്ച് സെക്രട്ടറി അനീഷ് എന്നിവർക്കെതിരെയാണ് തളിപ്പറമ്പ് പോലീസ് കേസെടുത്തത്.ഒരാൾ അറസ്റ്റിൽ
ഇന്നലെ വൈകിട്ടാണ് ആദ്യ കേസിനാസ്പദമായ സംഭവം. പ്ലസ് വൺ വിദ്യാർത്ഥിയെ സിപിഎം, ബ്രാഞ്ച് സെക്രട്ടറിയായ പ്രതി രമേശൻ ആളൊഴിഞ്ഞ പറമ്പിലെത്തിച്ച് ലൈംഗിക ചൂഷണത്തിനിരയാക്കി. പീഡനത്തെത്തുടർന്ന് അവശനായ വിദ്യാർത്ഥി സുഹൃത്തുക്കളെ വിവരമറിയിച്ചു. പിന്നാലെ രമേശനിൽ നിന്ന് ദുരനുഭവമുണ്ടായതായി കൂടുതൽ വിദ്യാർത്ഥികൾ വെളിപ്പെടുത്തി. ഇതോടെ വിദ്യാർഥികൾ സംഘടിച്ച് രമേശനെ ഫോണിൽ വിളിച്ച് സംഭവം നടന്ന സ്ഥലത്തെത്താൻ ആവശ്യപ്പെട്ടു. കുട്ടികളൊരുക്കിയ കെണി തിരിച്ചറിയാതെ രമേശൻ തന്റെ സുഹൃത്ത് കൂടിയായ മുയ്യം ബ്രാഞ്ച് സെക്രട്ടറി അനീഷിനെയും കൂട്ടി സ്ഥലത്തെത്തി. രമേശനെ പിടികൂടിയ വിദ്യാർത്ഥികൾ, രക്ഷിതാക്കളുടെ സഹായത്തോടെ പോലീസിന് കൈമാറി. ഇതിനിടെ അനീഷ് ഓടി രക്ഷപ്പെട്ടു. ചൈൽഡ്‌ലൈൻ വിദ്യാർഥികളുടെ മൊഴി രേഖപ്പെടുത്തിയതോടെ അനീഷും കുട്ടികളെ ലൈംഗിക ചൂഷണത്തിന് ഇരയാക്കിയ വിവരം പുറത്തായി. രമേശന്റെ അറസ്റ്റ് രേഖപ്പെടുത്തി, കോടതിയിൽ ഹാജരാക്കിയ ഇയാളെ റിമാൻഡ് ചെയ്തു. ഒളിവിൽ കഴിയുന്ന അനീഷിനായി തിരച്ചിൽ ഊർജതമാക്കി. കഴിഞ്ഞ ദിവസം നടന്ന ബ്രാഞ്ച് സമ്മേളനങ്ങളിലാണ് ഇരുവരെയും സെക്രട്ടറിമാരായി തിരഞ്ഞെടുത്തത്. ഇരുവരെയും പാർട്ടിയിൽ നിന്ന് പുറത്താക്കിയതായി സിപിഐഎം ജില്ലാ നേതൃത്വം വ്യക്തമാക്കി.
