മലപ്പുറം.നാളെ രാഷ്ട്രീയ പാർട്ടി പ്രഖ്യാപിക്കാനിരിക്കെ നാടകീയ നീക്കവുമായി പി വി അൻവർ എംഎൽഎ. ചെന്നൈയിലെത്തിയ പി വി അൻവർ ഡിഎംകെ നേതാക്കളുമായി കൂടിക്കാഴ്ച നടത്തി. ഇതോടെ പി വി അൻവർ ഡിഎംകെയുടെ ഭാഗമാകുമോ എന്ന് ഉറ്റുനോക്കുകയാണ് രാഷ്ട്രീയ കേരളം. പി വി അൻവറിന്റെ അനുയായികൾ സമൂഹമാധ്യമങ്ങളിൽ എം കെ സ്റ്റാലിന്റെ ചിത്രങ്ങൾ പങ്കുവച്ചതും അഭ്യൂഹങ്ങൾ ശക്തമാക്കി. നാളെ മഞ്ചേരിയിൽ നിശ്ചയിച്ച നയവിശദീകരണത്തിൽ മാറ്റമില്ലെന്ന് പി വി അൻവർ വ്യക്തമാക്കിയിട്ടുണ്ട്.
രാഷ്ട്രീയപ്പാർട്ടി രൂപീകരിക്കുന്നു എന്ന പ്രഖ്യാപനം പോലെ അപ്രതീക്ഷിതമായിരുന്നു പിവി അൻവറിൻറെ ഇന്നത്തെ ചെന്നൈ നീക്കവും. ഇന്നലെ ചെന്നൈയിൽ എത്തിയ അൻവറിൻ്റെ മകൻ റിസ്വാൻ മന്ത്രിയും എം.കെ സ്റ്റാലിൻ്റെ വിശ്വസ്തനുമായ സെന്തിൽ ബാലാജിയുമായി ചർച്ച നടത്തി. അൻവറിനു വേണ്ടി മകൻ കളത്തിലിറങ്ങിയെന്നതും എടുത്തു പറയണം. ഇന്ന് പുലർച്ചെ ചെന്നൈയിലേക്ക് തിരിച്ച അൻവർ ഡിഎംകെ സംസ്ഥാന നേതാക്കളുമായി കൂടിക്കാഴ്ച്ച നടത്തി. സംസ്ഥാന നേതാക്കൾ അൻവറിനെ ഷാൾ പുതച്ച് സ്വീകരിച്ചു. ഈ ദൃശ്യങ്ങൾ പുറത്തുവന്നതോടെ അൻവർ നാളെ പ്രഖ്യാപിക്കുന്ന രാഷ്ട്രീയ പാർട്ടി ഡിഎംകെ മുന്നണിയുടെ ഭാഗമാകുമോ എന്ന രാഷ്ട്രീയകാംക്ഷയാണ് ഉയർന്നിരിക്കുന്നത്.
ദേശീയ രാഷ്ട്രീയത്തിലേക്കോ എന്ന ചോദ്യത്തോടെയാണ് ഇ.എ സുകു ഫേസ്ബുക്ക് പോസ്റ്റ് അവസാനിപ്പിക്കുന്നത്. ചെന്നൈ മുസ്ലിം ലീഗ് നേതാക്കളുമായി അൻവർ കൂടിക്കാഴ്ച നടത്തിയെന്നും വിവരമുണ്ട്. നാളെ വൈകിട്ട് ആറുമണിക്കാണ് മഞ്ചേരിയിൽ വച്ച് അൻവറിന്റെ രാഷ്ട്രീയ പാർട്ടി പ്രഖ്യാപന പൊതുസമ്മേളനം. ഇതിലേക്ക് ഡിഎംകെ നേതാക്കൾ എത്തുമോ എന്നതും പ്രധാനമാണ്. പൊതുസമ്മേളനം ശക്തിപ്രകടനം ആകുമെന്നും ഉറപ്പ്. സംഘപരിവാറിനെതിരെ നിരന്തരം നിലപാട് എടുക്കുന്ന ഡിഎംകെയുമായി അൻവർ നടത്തിയ ഈ നീക്കം വരും ദിവസങ്ങളിൽ കേരള രാഷ്ട്രീയത്തിൽ വലിയ ചർച്ചയാകും.
