കോതമംഗലം . ഭൂതത്താൻകെട്ടിൽ സിനിമ ചിത്രീകരണത്തിനിടെ ഓടിപ്പോയ നാട്ടാന പുതുപ്പള്ളി സാധു കാടിറങ്ങി. ഇന്നലെ രാത്രിയും ഇന്ന് രാവിലെയുമായി നടത്തിയ തിരച്ചിലിനൊടുവിലാണ് ആനയെ കണ്ടെത്തിയത്. ആന പൂർണ ആരോഗ്യവാനാണ്.
തെലുങ്ക് സൂപ്പർതാരം വിജയ് ദേവരകൊണ്ട നായകനാകുന്ന സിനിമയുടെ ഷൂട്ടിങ്ങിനിടെയാണ് സംഭവം. ചിത്രീകരണത്തിന് കൊണ്ടുവന്നത് അഞ്ച് ആനകളെ. ചിത്രീകരണം അവസാനഘട്ടത്തിലെത്തിയപ്പോൾ ഇന്നലെ വൈകിട്ട് അഞ്ച് മണിയോടെയാണ് ട്വിസ്റ്റുണ്ടായത്. തടത്താവിള മണികണ്ൻ എന്ന ആന പുതുപ്പള്ളി സാധുവിന്റെ പിന്നിൽ കുത്തി. വിരണ്ടോടിയ സാധു കാട്ടിൽ മറഞ്ഞു.
ഇന്നലെ രാത്രി ഏറെ വൈകിയും തിരച്ചിൽ നടത്തി. ആനയെ കണ്ടെത്താൻ കഴിഞ്ഞില്ല. ഇന്ന് പുലർച്ചെ ഫോറസ്റ്റ് വാച്ചർമാർ കാൽപ്പാടുകൾ പിന്തുടർന്ന് പോയപ്പോഴാണ് തുണ്ടം ഫോറസ്റ്റ് ഓഫീസിന് സമീപത്തെ കാട്ടിൽ ആനയെ കണ്ടത്.
പഴവും മധുര പലഹാരവും നൽകി ആനയെ തളച്ച പാപ്പാൻമാർ വാഹനത്തിൽ കയറ്റി പുതുപ്പള്ളിയിൽ എത്തിച്ചു. ആനയ്ക്ക് കാര്യമായ ആരോഗ്യപ്രശ്നങ്ങളില്ല
