തൃശൂര്‍. ചേലക്കര ഉപതെരഞ്ഞെടുപ്പ് സ്ഥാനാർഥി ചർച്ചയ്ക്കായി സിപിഎം തൃശ്ശൂർ ജില്ലാ കമ്മിറ്റി യോഗം നാളെ. ഇന്നലെ സിപിഐഎം സംസ്ഥാന സെക്രട്ടറി എം.വി ഗോവിന്ദൻ പങ്കെടുത്ത് ചേർന്ന ജില്ലാ സെക്രട്ടറിയേറ്റ് സ്ഥാനാർത്ഥത്തെ സംബന്ധിച്ചും മുന്നൊരുക്കങ്ങളെ സംബന്ധിച്ചും വിശദമായ ചർച്ച നടത്തിയിരുന്നു. സ്ഥാനാർത്ഥിയുടെ പട്ടിക സംബന്ധിച്ച് സംസ്ഥാന കമ്മിറ്റി അംഗങ്ങളോടും ജില്ലയിലെ മുതിർന്ന നേതാക്കളോടും കൂടിയാലോചന നടത്തി പട്ടിക ജില്ലാ കമ്മിറ്റിയിൽ ചർച്ച ചെയ്യാനാണ് നിർദ്ദേശമുയർന്നത്. ഇന്നലെ ചേർന്ന ജില്ലാ സെക്രട്ടറിയേറ്റിൽ മുൻ എംഎൽഎ യു ആർ പ്രദീപിന്റെ പേരിൽ ഊന്നിയുള്ള ചർച്ചകളായിരുന്നു നടന്നത്. മറ്റു പേരുകൾ കൂടി ഉൾപ്പെടുത്തി ജില്ലാ കമ്മിറ്റിയിൽ ചർച്ച ചെയ്യാനാണ് നീക്കം. നാളത്തെ ജില്ലാ കമ്മിറ്റിയുടെ തീരുമാനം സംസ്ഥാന കമ്മിറ്റി അറിയിക്കും. വെള്ളിയാഴ്ച ചേരുന്ന സംസ്ഥാന സെക്രട്ടറിയേറ്റ് ജില്ലാ കമ്മിറ്റി നിർദേശം വിശദമായി ചർച്ച ചെയ്യും.
