സംസ്ഥാനത്ത് വിവിധ ഇടങ്ങളിൽ ഉണ്ടായ വാഹനാപകടങ്ങളിൽ നാലു മരണം. മൂന്നാറിൽ ട്രാക്ടർ ഇടിച്ച് കാർ യാത്രികൻ മരിച്ചു. ആലുവയിലും അത്താണിക്കലിലും ഉണ്ടായ അപകടങ്ങളിൽ ബൈക്ക് യാത്രക്കാരായ മൂന്നു പേർക്ക് ദാരുണാന്ത്യം. കോഴിക്കോട് അത്തോളിയിൽ സ്വകാര്യ ബസ്സുകൾ കൂട്ടിയിടിച്ച് നിരവധി പേർക്ക് പരിക്ക്.
മൂന്നാറിൽ വിനോദസഞ്ചാരികളുടെ കാർ തേയില കയറ്റി വന്ന ട്രാക്ടറുമായി കൂട്ടിയിടിച്ചായിരുന്നു അപകടം. കാറിൽ ഉണ്ടായിരുന്ന തമിഴ്നാട് സേലം സ്വദേശി നന്ദകുമാർ മരിച്ചു. എറണാകുളം ആലുവ കുറ്റിക്കാട്ടുകരയിൽ ബൈക്കിൽ മിനി ലോറി ഇടിച്ചു കയറി. ബൈക്ക് യാത്രികരായ രാഹുൽരാജ് ആദിഷ് എന്നിവരെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മലപ്പുറം അത്താണിക്കലിൽ ബസ്സും ബൈക്കും കൂട്ടിയിടിച്ച് ബൈക്ക് യാത്രികനായ പറമ്പിൽ പീടിക സ്വദേശി മുഹമ്മദ് ഹാഷിർ മരിച്ചു. കോഴിക്കോട് അത്തോളി കോളിയോട്ട് താഴത്ത് വച്ചായിരുന്നു സ്വകാര്യബസ്സുകൾ കൂട്ടിയിടിച്ചുണ്ടായ അപകടം. നിയന്ത്രണം നഷ്ടപ്പെട്ട എസി ബ്രദേഴ്സ് എന്ന ബസ് അജുവ ബസ്സിലേക്ക് ഇടിച്ചുകയറുകയായിരുന്നു.
അപകടത്തിൽ പരിക്കേറ്റ അൻപതോളം പേരെ വിവിധ ആശുപത്രികളിൽ പ്രവേശിപ്പിച്ചു.ആരുടെയും പരിക്ക് ഗുരുതരമല്ല.
