Advertisement
മലപ്പുറം. എടപ്പാളിൽ വടിവാൾ വീശി ഭീകരാന്തരീക്ഷം സൃഷ്ടിച്ച പ്രതി പിടിയിൽ. എടപ്പാൾ സ്വദേശി ഷിബു എന്ന ഷഹബാസിനെയാണ് ചങ്ങരംകുളം പോലീസ് പിടികൂടിയത്. ബാർബർ ഷോപ്പിൽ കയറിയാണ് ഇയാൾ അതിക്രമം കാണിച്ചത്.
ശുകപുരത്തുള്ള ബാർബർ ഷോപ്പിൽ കയറി ഷഹബാസ് അക്രമം അഴിച്ചുവിടുകയായിരുന്നു. പണം ചോദിച്ച് ബാർബർ ഷോപ്പ് ജീവനക്കാരനായ പ്രജീഷിന് നേരെ വടിവാൾ വീശി. അക്രമം തടയാൻ ശ്രമിച്ച പ്രജീഷിന്റെ സുഹൃത്ത് വിനോദിന്റെ കൈവിരലിന് പരിക്കേറ്റു. ബാർബർ ഷോപ്പ് പ്രതി അടിച്ചു തകർത്തു. തുടർന്ന് ചങ്ങരംകുളം പോലീസിൽ പ്രജീഷ് നൽകിയ പരാതിയെ തുടർന്നാണ് ഷഹബാസ് പിടിയിലാകുന്നത്. ഇയാളെ പൊന്നാനി ജുഡീഷ്യൽ മജിസ്ട്രേറ്റിൽ ഹാജരാക്കി റിമാൻഡ് ചെയ്തു. എടപ്പാൾ പ്രദേശത്ത് ലഹരി മാഫിയ പിടിമുറുക്കുന്നു എന്ന പരാതി വ്യാപകമായി നാട്ടുകാർക്ക് ഉണ്ട്. രാത്രികാലങ്ങളിൽ പോലീസ് പെട്രോളിങ് ശക്തമാക്കണമെന്നാണ് ആവശ്യം.
Advertisement
