മലപ്പുറം: കെഎസ്ആര്‍ടിസി മലപ്പുറം ഡിപ്പോയില്‍ നിന്ന് ഞായറാഴ്ച ബാംഗ്ലൂരിലേക്ക് പോയ സൂപ്പര്‍ ഡീലക്‌സ് ബസ് കര്‍ണാടകയിലെ നഞ്ചന്‍കോടിന് സമീപം മധൂരില്‍ നിയന്ത്രണം വിട്ട് ഡിവൈഡറില്‍ ഇടിച്ചു കയറി ഡ്രൈവര്‍ മരിച്ചു. മലപ്പുറം താനാളൂര്‍ പകര ചക്കിയത്തില്‍ ഹസീബ് (47) ആണ് മരിച്ചത്. മലപ്പുറം ഡിപ്പോയില്‍ നിന്ന് ബാംഗ്ലൂരിലേക്ക് പുറപ്പെട്ട കെഎസ്ആര്‍ടിസിയുടെ സൂപ്പര്‍ ഡീലക്‌സ് ബസ്സാണ് പുലര്‍ച്ചെ നാലോടെ നഞ്ചന്‍കോടിന് സമീപം മധൂരില്‍ അപകടത്തില്‍പെട്ടത്.
മുമ്പില്‍ പോയ കാര്‍ പെട്ടെന്ന് ബ്രേക്ക് ഇട്ടത് മൂലം കൂട്ടിയിടി ഒഴിവാക്കാന്‍ ബസ് വെട്ടിച്ചപ്പോള്‍ നിയന്ത്രണം നഷ്ടപ്പെട്ട് ഡിവൈഡറില്‍ ഇടിക്കുകയായിരുന്നു. സീറ്റില്‍ നിന്ന് തെറിച്ച ഹസീബ് ബസിന്റെ മുന്‍വശത്തെ ഗ്ലാസിലടിച്ച് തലയ്ക്കും വാരിയെല്ലിനും ഗുരുതര പരിക്കുണ്ടായതാണ് ജീവന്‍ നഷ്ടപ്പെടാന്‍ ഇടയായത്. യാത്രക്കാര്‍ക്ക് ആര്‍ക്കും പരിക്കില്ല. അച്ഛന്‍: സിദ്ദീഖ്. അമ്മ: ഇയ്യാത്തുട്ടി. ഭാര്യ: ബദറുന്നിസ. മക്കള്‍: ഹനാന്‍, അല്‍ഫ. സഹോദരങ്ങള്‍: ബാസീം, ഹഫീദ്, സക്കീന.
