കൊച്ചി. ഫോർട്ട് കൊച്ചിയിൽ നിർമ്മാണം നടക്കുന്ന കാനയിൽ വീണ് വിദേശ വിനോദ സഞ്ചാരിക്ക് ഗുരുതര പരുക്ക് .ഫ്രാൻസിൽ നിന്നെത്തിയ ഭിന്നശേഷിക്കാരനായ യുവാവാണ് കാനയിൽ വീണത് . നിർമ്മാണ പ്രവർത്തനങ്ങൾ നടക്കുന്ന സ്ഥലത്ത് സുരക്ഷാ ക്രമീകരണങ്ങൾ ഒരുക്കാത്തതാണ് അപകടകാരണമെന്ന് നാട്ടുകാർ ആരോപിച്ചു.
ഫോർട്ട് കൊച്ചി കസ്റ്റംസ് ജെട്ടിയിൽ നിന്ന് പുറത്തേക്കുള്ള വഴിയിൽ നിർമ്മാണ പ്രവർത്തനങ്ങൾ നടക്കുന്ന കാനയിലാണ് ഫ്രാൻസിൽ നിന്ന് എത്തിയ ലാൻഡൻ എന്ന യുവാവ് കാൽ വഴുതി വീണത്. തുടയെല്ലിന് ഗുരുതരമായി പരുക്കേറ്റ ലാൻഡനെ കളമശേരി മെഡി.കോളജിൽ ശസ്ത്രക്രിയക്ക് വിധേയനാക്കി. കാനയുടെ നിർമ്മാണം സമയബന്ധിതമായി പൂർത്തിയാക്കത്തതും. സുരക്ഷാ ക്രമീകരണങ്ങൾ ഒരുക്കാത്തതും അപകട കാരണമായി നാട്ടുകാർ പറയുന്നു.
നിർമ്മാണ പ്രവർത്തനങ്ങൾ നടക്കുന്നതിനാൽ ഇടുങ്ങിയ വഴിയിലൂടെയാണ് ആളുകൾക്ക് ജെട്ടിയിലേക്ക് പോകുവാൻ കഴിയു. നിർമ്മാണ പ്രവർത്തനങ്ങൾ നടക്കുന്നതിൻ്റെ സൂചനാ ബോർഡുകൾ അപകടം ഉണ്ടായതിന് ശേഷമാണ് വെച്ചത്. ആളുകൾക്ക് സഞ്ചരിക്കാൻ സമാന്തരമായി വഴി ഒരുക്കാതെ നിർമ്മാണം പ്രവർത്തനങ്ങൾ തുടർന്നാൽ അപകടങ്ങൾ ആവർത്തിക്കുമെന്നാണ് നാട്ടുകാരുടെ ആരോപണം
