കൊച്ചി. വഖഫ് ഭൂമി കൈവശം വെക്കുന്നത് കുറ്റകരമാക്കുന്ന നിയമ ഭേദഗതിക്ക് മുന്‍കാല പ്രാബല്യമില്ലെന്ന് ഹൈക്കോടതി. വഖഫ് ഭൂമി കൈവശം വച്ചുവെന്ന് ആരോപിച്ച് രജിസ്റ്റര്‍ ചെയ്ത കേസ് ഹൈക്കോടതി റദ്ദാക്കി. വഖഫ് ബോര്‍ഡിന്റെ പരാതിയുടെ അടിസ്ഥാനത്തിൽ പോസ്റ്റല്‍ ഉദ്യോഗസ്ഥര്‍ക്കെതിരെയാണ് നേരത്തെ കേസ് രജിസ്റ്റര്‍ ചെയ്തത്.
വഖഫ് ഭൂമി അനധികൃതമായി കൈവശം വച്ചു എന്ന് ചൂണ്ടിക്കാട്ടി കാലിക്കറ്റ് പോസ്റ്റല്‍ ഡിവിഷന്‍ സീനിയര്‍ സൂപ്രണ്ട്, മാരിക്കുന്ന് സബ് പോസ്റ്റ് മാസ്റ്റര്‍ എന്നിവര്‍ക്കെതിരെ എടുത്ത കേസാണ് ഹൈക്കോടതി റദ്ദാക്കിയത്. 2013ല്‍ മാത്രമാണ് വഖഫ് ഭേദഗതി നിയമവും നിലവിൽ വന്നതെന്നും എന്നാൽ 1999 മുതൽ പോസ്റ്റ് ഓഫീസ് അവിടെയുണ്ടെന്നും കോടതി ചൂണ്ടിക്കാട്ടി. വഖഫ് ഭൂമി കൈവശം വെക്കുന്നത് കുറ്റകരമാക്കുന്ന നിയമ ഭേദഗതിക്ക് മുന്‍കാല പ്രാബല്യമില്ലെന്നതിനാൽ കേസ് നിലനിൽക്കില്ലന്നാണ് ഉത്തരവിൽ പറയുന്നത്.
2017ലാണ് കോഴിക്കോട് പോസ്റ്റ് ഓഫീസ് ജീവനക്കാര്‍ക്കെതിരെ കേസ് എടുത്തത്. വഖഫ് ബോര്‍ഡിന്റെ പരാതിയുടെ അടിസ്ഥാനത്തിലായിരുന്നു നടപടി. ഹൈക്കോടതി ഉത്തരവോടെ കോഴിക്കോട് ഒന്നാം മജിസ്ട്രേറ്റ് കോടതിയിലെ നടപടികൾ അസാധുവായി. മുനമ്പം, ചാവക്കാട്, വയനാട് അടക്കമുള്ള മേഖലകളില്‍ വഖഫ് ഭൂമിയുമായി ബന്ധപ്പെട്ട ആശങ്കകള്‍ ഉയര്‍ന്നു വരുന്ന സാഹചര്യത്തിലാണ് നിര്‍ണായക വിധി.
