തൃശൂര്‍. പൊയട്രി ഫൗണ്ടേഷൻ ഏർപ്പെടുത്തിയ പ്രഥമ കേസരി ബാലകൃഷ്ണ പിള്ള സാഹിത്യപുരസ്കാരം ഡോ. മുഞ്ഞിനാട് പത്മകുമാറിന് ലഭിക്കും. കവിത, ജീവചരിത്രം, വിവർത്തനം, വിമർശനം എന്നീ മേഖലകളിൽ നൽകിയ സമഗ്രസംഭാവനകളെ മുൻനിർത്തിയാണ് പുരസ്കാരം. സാഹിത്യത്തിന്റെ്റെ വിവിധ മേഖലകളിൽ അറുപതോളം കൃതികൾ ഡോ. മുഞ്ഞിനാടിന്റേതായി പ്രസിദ്ധീകരിച്ചിട്ടുണ്ട്. ഡോ. സി.രാവുണ്ണി ചെയർ മാനും രാജീവ് ആലുങ്കൽ, എൻ.എസ്.സുമേഷ് കൃഷ്‌ണൻ എന്നി വർ അംഗങ്ങളുമായ കമ്മറ്റിയാണ് ഡോ. മുഞ്ഞിനാടിനെ തെരഞ്ഞെടുത്തത്.
22222 രൂപയും പ്രശസ്തിപത്രവും മയൂരശില്‌പവുമടങ്ങുന്നതാണ് പുരസ്കാരം. നവംബർ 16-ാം തീയതി കേരളപ്പിറവി കവിതകളുടെ പ്രകാശന ചടങ്ങിൽ വച്ച് കേരള സാഹിത്യഅക്കാദമി പ്രസിഡൻ്റ് സച്ചിദാനന്ദൻ പുരസ്കാരം സമ്മാനിക്കും.
പൊയട്രി ഫൗണ്ടേഷന്റെ ഉദ്ഘാടനവും കേസരി ബാലകൃഷ്ണപിള്ള സാഹിത്യ പുരസ്‌കാര സമർപ്പണവും പത്തു കാവ്യസമാഹാരങ്ങളുടെ പ്രകാശനവും 2024 നവംബർ 16-ാം തീയതി ശനിയാഴ്‌ച രാവിലെ പത്തുമണിക്ക് കേരള സാഹിത്യ അക്കാദമി ചങ്ങമ്പുഴ ഹാളിൽ വച്ച് പ്രശസ്‌ത കവി രാവുണ്ണി ഉദ്ഘാടനം ചെയ്യും. പ്രകാശനത്തിനു ശേഷം കാവ്യോത്സവം നടക്കും. ഉച്ചകഴിഞ്ഞ് ചേരുന്ന പൊയട്രി ഫൗണ്ടേഷൻ സാംസ്കാരികസദസ്സ് കേരള സാഹിത്യ അക്കാദമി പ്രസിഡൻ്റ് സച്ചിദാനന്ദൻ ഉദ്ഘാടനം ചെയ്യും. പ്രസ്‌തുത ചടങ്ങിൽ വച്ച് പൊയട്രി ഫൗണ്ടേഷൻ ഏർപ്പെടുത്തിയ പ്രഥമ കേസരി ബാലകൃഷ്ണപിള്ള സാഹിത്യപുരസ്കാരം ഡോ. മുഞ്ഞിനാട് പത്മകുമാറിന് സച്ചിദാനന്ദൻ സമ്മാനിക്കും. ഡോ. രാവുണ്ണി അദ്ധ്യക്ഷനാകുന്ന ചടങ്ങിൽരാജീവ് ആലുങ്കൽ മുഖ്യപ്രഭാഷണം നിർവ്വഹിക്കും. ഏങ്ങണ്ടിയൂർ ചന്ദ്രശേഖരൻ ‘എൻ്റെ കവിത എൻ്റെ ജീവിതം’ എന്ന വിഷയത്തിൽ സംസാരിക്കും. പൊയട്രി ഫൗണ്ടേഷൻ ചെയർമാൻ അജികുമാർ നാരായണൻ, ശിവൻ സുധാലയം, ശ്യാംതറമേൽ, രാജേഷ് ശ്രീധർ, പുഷ്‌പ കൊളവയൽ എന്നിവർ സംസാരിക്കും.
പത്രസമ്മേളനത്തിൽ ഡോ. സി. രാവുണ്ണി, (ചെയർമാൻ അവാർഡ് കമ്മിറ്റി), അജികുമാർ നാരായണൻ, (ചെയർമാൻ പൊയട്രി ഫൗണ്ടേഷൻ), രാജേഷ് ശ്രീധർ, (സെക്രട്ടറി, പൊയട്രി ഫൗണ്ടേഷൻ.) എന്നിവര്‍ പങ്കെടുത്തു.
