പാലക്കാട്: മുൻ തിരഞ്ഞെടുപ്പുകളിൽ ബഹുദൂരം പിറകിൽ പോയ ഇടത് മുന്നണിക്ക് ഇത്തവണത്തെ തെരഞ്ഞെടുപ്പ് ഫലം ആശ്വാസം നൽകുന്നതാണ്. ഉപതിരഞ്ഞെടുപ്പിൽ
പാലക്കാട് ബി ജെ പിയും എൽ ഡി എഫും തമ്മിൽ 2256 വോട്ടുകളുടെ വ്യത്യാസം മാത്രം. ഇന്ന് ഫലമറിഞ്ഞ ഉപതിരഞ്ഞെടുപ്പിൽ ബിജെപി സ്ഥാനാർത്ഥി സി കൃഷ്ണകുമാർ 39549 വോട്ടുകൾ നേടിയപ്പോൾ മൂന്നാം സ്ഥാനത്തെത്തിയ ഇടത് സ്വതന്ത്രൻ ഡോ.പി. സരിൻ 37 293 വോട്ടുകൾ നേടി.ബി ജെ പിയും എൽ ഡി എഫും തമ്മിലുള്ള വ്യത്യാസം 2256 വോട്ടുകൾ മാത്രം.
2024 ലെ പാർലമെൻറ് തിരഞ്ഞെടുപ്പിൽ ബിജെപി 43072 വോട്ടുകളും എൽ ഡി എഫ് 34640 വോട്ടുകളും നേടി. അന്ന് ഇരു മുന്നണികളും തമ്മിലുള്ള വോട്ട് വ്യത്യാസം 8432 ആയിരുന്നു.അതിൽ നിന്നാണ് ഇപ്പോൾ 2256 വോട്ടിലേക്ക് ഇടത് മുന്നണി എത്തിച്ചേർന്നത്.
2021 ലെ അസംബ്ലി ഇലക്ഷനിൽ ബിജെപി 49156 വോട്ടും ഇടത് മുന്നണി 35620 വോട്ടു കളുമാണ് നേടിയത്. അന്ന് ഇരു മുന്നണികളും തമ്മിൽ 13536 വോട്ടുകളുടെ വ്യത്യാസമുണ്ടായിരുന്നു. കോൺഗ്രസ് വിട്ട് ഇടത് പക്ഷത്തേക്ക് ചേക്കേറിയ പി സരിൻ എന്ന സ്ഥാനാർത്ഥിയെ മുൻനിർത്തി ഇടത് മുന്നണി പാലക്കാട്ട് നടത്തിയ രാഷ്ട്രീയ പോരാട്ടിൽ ഇരു പാർട്ടികളും തമ്മിലുള്ള വോട്ട് വ്യത്യാസം 2256 ലേക്ക് കുറച്ചു കൊണ്ട് വരാനായത് ഇടത് മുന്നണിക്ക് ആശ്വാസത്തിന് വക നൽകുന്നു.
