അമ്പലപ്പുഴ .വളഞ്ഞവഴിയിൽ പുലിമുട്ടും കടൽ ഭിത്തിയും നിർമിക്കാത്തതിൽ പ്രതിഷേധിച്ച് മന്ത്രി സജി ചെറിയാൻ പങ്കെടുത്ത വേദിയിലേക്ക് ബി.ജെ.പി പ്രവർത്തകരുടെ മാർച്ച്.. മാർച്ച് തടയാനെത്തിയ സിപിഐഎം പ്രവർത്തകരുമായി വാക്കേറ്റം. മത്സ്യഫെഡ് ജില്ലാ ഓഫീസ് കെട്ടിട സമുച്ചയ ഉദ്ഘാടനം നടന്ന വളഞ്ഞ വഴിയിലാണ് ബി.ജെ.പി പ്രവർത്തകർ മാർച്ച് നടത്തിയത്.മന്ത്രി സജി ചെറിയാനായിരുന്നു ഇതിൻ്റെ ഉദ്ഘാടകൻ. ബി.ജെ.പി പഞ്ചായത്തംഗം സുമിതയുടെ വാർഡായ നീർക്കുന്നത്ത് പുലിമുട്ടോടു കൂടിയ കടൽ ഭിത്തി നിർമിക്കാത്തതിൽ പ്രതിഷേധിച്ചാണ് ഉദ്ഘാടന വേദിയുടെ ഏതാനും സമീപത്തു നിന്ന് മാർച്ചാരംഭിച്ചത്.
പഞ്ചായത്തംഗം സുമിത, ബി.ജെ.പി അമ്പലപ്പുഴ നിയോജക മണ്ഡലം പ്രസിഡൻ്റ് ബാബുരാജ് എന്നിവരുടെ നേതൃത്വത്തിൽ സ്ത്രീകൾ ഉൾപ്പെടെ 30 ഓളം പേരാണ് മാർച്ചിൽ പങ്കെടുത്തത്.മാർച്ച് വേദിക്കരികിൽ എടത്വ സി.ഐ: അൻവറിൻ്റെ നേതൃത്വത്തിലുള്ള പോലീസ് തടഞ്ഞു. ഇതിനിടയിൽ സ്ഥലത്തുണ്ടായിരുന്ന സി.പിഎം നേതാക്കളും മാർച്ചിനെതിരെ സംഘടിച്ച് ഇവിടെയെത്തിയതോടെ സംഘർഷാവസ്ഥയായി. സി.പിഎം പ്രവർത്തകരെ പിന്തിരിപ്പിക്കാൻ പോലീസ് ശ്രമിച്ചെങ്കിലും വീണ്ടും ഇവർ തടിച്ചു കൂടി.ഒടുവിൽ ബി.ജെ.പി നേതാക്കളെയും പ്രവർത്തകരെയും പോലീസ് അറസ്റ്റ് ചെയ്തു നീക്കി.
